11.07.2019 Һыу инегеҙ, әммә һаҡ булығыҙ
Йәй – отпуск, каникул мәле. Әлбиттә, көтөп алған ялды һәр кем һыу буйында үткәрергә тырыша. Әммә ошо матур, ҡыуаныслы осор бәхетһеҙлеккә, ҡара ҡайғыға әүерелмәһен өсөн һыу ингәндә бик һаҡ булырға кәрәк. Статистика буйынса, йыл һайын һыу ятҡылыҡтарында уртаса 10 мең кеше һәләк була. Шуға күрә һыу ингәндә ябай ғына ҡағиҙәләрҙе тотоу мөһим.
1. Йөҙә белеү генә һыуҙа хәүефһеҙлекте тәьмин итә тигән һүҙ түгел. Хатта бик яҡшы йөҙгән кешенең дә һыуҙа арыуы, йә булмаһа, аяҡ-ҡулын көҙән йыйырыуы ихтимал. Шунлыҡтан, йөҙә белеүгә генә ышанып, тәрәнгә барырға һәм алыҫҡа йөҙөргә ярамай. Ә инде йөҙә белмәгән кешеләргә билдән тәрән һыуҙа йөҙөү бөтөнләй тыйыла.
2. Махсус йыһазландырылмаған урындарҙа һыу инеүҙән тыйылырға кәрәк. Сөнки бындай урындарҙа һыу аҫты тикшерелмәгән һәм сүп-сарҙан таҙартылмаған була, ә унда нимә генә ятмауы мөмкин.
3. Таныш булмаған урында һыуға сумыуҙан да һаҡланығыҙ. Һыу төбөндә ятҡан таш, ағас ботағы, тимер-томор ҡазаға килтереүе бар.
4. Температура режимына ла иғтибар итергә онотмағыҙ. Һауа температураһы 20 градустан түбән булғанда һыу инергә кәңәш ителмәй, сәләмәтлеккә зыян килеү хәүефе һағалай. Ә башҡа ваҡытта һыуҙа 20 – 30 минуттан оҙағыраҡ булырға кәңәш ителмәй. Юғиһә өшөү йөрәк тибешенең йышайыуына һәм тын етмәүгә килтереүе мөмкин. Белгестәр ашағандан һуң 2 сәғәт үткәс кенә һыу инергә кәңәш итә.
5. Йыш ҡына тап балалар һыу ҡорбанына әүерелә. Шунлыҡтан уларҙың үҙҙәрен генә һыуға яҡын ебәрергә ярамай, әлбиттә. Кескәйҙәр менән һыу буйына барҙығыҙ икән, ҡарап ҡына торорға кәрәк. Бала йөҙә белһә лә, үҙенең көсөн дөрөҫ иҫәпләмәй, арып, хәлдән тайыуы ихтимал. Өҫтәүенә, улар һыуҙа ололарға ҡарағанда тиҙерәк өшөй.
6. Ҙур һыу ятҡылыҡтарында кәмәлә йә катамаранда йөҙгәндә махсус жилет кейергә онотмағыҙ. Кәмә әйләнеп китһә, башҡа бер нәмә лә һеҙҙе ҡотҡара алмаясаҡ.
7. Эскән килеш һыу инеү ҡәтғи тыйыла. Һыуға батып үлеүселәрҙең яртыһынан күбеһен тап шулар тәшкил итеүен иҫәпкә алғанда, быны һәр кем яҡшы аңларға тейеш.
8. Кәмәләргә, караптарға яҡын барырға ла ярамай, тән йәрәхәттәре алыу хәүефе көслө.
9. Һыу эсендә сумып, баҫтырышып, айырыуса батырышып уйнау хәүефле. Кеше һыу ингәндә былай ҙа тиҙ арый, уйындан уймаҡ сығарыуҙан һаҡланығыҙ.
10. Һәм, әлбиттә, һыу ятҡылығын, сүп-сар ҡалдырып, бысратыу тыйыла.