21.10.2018 Зыяны юҡ, файҙаһы күп
Активлаштырылған күмер, ағыуланыуға ҡаршы сара булараҡ, медицинала йыш ҡулланыла. Ул – сорбент, йәғни төрлө зарарлы химик берләшмәләрҙе бергә туплап, тәбиғи юл менән уларҙы организмдан сығарырға һәләтле.
Аллергия, метеоризм, аҙыҡтан ағыуланыу кеүек ауырыуҙарҙан күмер яҡшы ярҙам итә. Ауырлы ҡатындарҙың үҙәге көйөүен баҫа.
Бигерәк тә уның он кеүек онтағын ҡулланыу яҡшы һөҙөмтә бирә. Бер балғалаҡ күмер онтағын стаканға һалып, өҫтөнә һыу ҡойорға һәм тиҙ генә болғатып, эсергә. Мәҫәлән, аллергияны киҫәтеү өсөн тәүлегенә бер – өс тапҡыр бер стакан таҙа һыуға бер балғалаҡ күмер онтағы ҡушып эсергә кәңәш ителә. Дауалағанда: 10 кг кәүҙә ауырлығына 1 – 2 төймә дарыу иҫәбенән сығып эш итергә. Балалар өсөн иһә тәүлегенә 10 төймәнән артырға тейеш түгел.
Был дарыуҙы артығын эсһәң дә зыяны юҡ, тип әйтерлек. Күләме түгел, ә ҡулланыу оҙайлығы ғына хәүефле. Оҙаҡ ваҡыт ҡулланғанда организмдан матдәләр алмашыныу процесы өсөн кәрәкле файҙалы элементтарҙы йыуып сығарыуы ихтимал.
Медицина тикшереүҙәре активлаштырылған күмер менән дауаланыуҙың юғары һөҙөмтәлелеген күрһәтә. Был ябай ғына, үҙе арзан да, бер ниндәй ҙә зыянһыҙ дарыу сәләмәтлеккә бәйле күп кенә проблеманан ҡотолдора.