21.08.2017 Йоҡлағанда ниңә шайыҡ аға?

Ҡайһы бер осраҡта төндә йоҡлаған ваҡытта ауыҙымдан шайыҡ ҡойола. Үҙем һиҙмәйем, әммә уянып китһәм, битем, мендәр еүешләнгән була. Бының сәбәбе нимәлә икән һәм хәүефләнергә урын бармы?
Морат.
Ишембай районы.

Беренсенән, ул төрлө ауырыуға бәйле булыуы ихтимал. Мәҫәлән, тымау тейгәндә танауҙан тын алыу ауырлашып, кеше ауыҙ менән тын ала башлай һәм шул ваҡытта күп итеп шайыҡ бүленеп сыға. Шулай уҡ ашҡаҙан-эсәк ауырыуҙары ла шайыҡ бүленеүенә йоғонто яһауы мөмкин. Кариес йәиһә пародонтоз һөҙөмтәһендә ауыҙ ҡыуышлығына инфекция эләккәндә лә төрлө бактерия күп итеп шайыҡ бүленеүгә килтерә. Нервы системаһы ауырыуҙары йәиһә уға йоғонто яһаусы препараттар ҡулланыу ҙа төп сәбәптәрҙең береһе булып тора. Шулай уҡ тәмәке тартыу, наркотик ҡулланыу кеүек алама ғәҙәттәрҙең дә төндә ауыҙҙан шайыҡ бүленеп сығыуға сәбәпсе булыуы бар.