06.04.2012 Әлдә бер белешмә етмәгән

Ул шул тиклем тормошҡа ғашиҡ! Бар булмышы, йәшәйеше, эше менән камиллыҡҡа, бәхеткә ынтылыусы ир аҫылы күңелдә ғорурлыҡ тойғоһо уята. “Баҫҡан ерендә ут сығара!” − тиҙәр ундайҙар хаҡында. Үҙенә генә хас йор күңеллелеге, йомартлығы, ихласлығы һәм сәмлелеге менән ул донъя­ға дәрт һәм йәм өҫтәй. Исеме лә бит әле ниндәй һоҡланғыс! Һүҙ кем тураһында бара, тиһегеҙме? Әлбитттә, Ирәндек Заһит улы БИРҘЕҒОЛОВ хаҡында.

Ейәнсура районының Үтәғол ауылында ғүмер кисереүсе Нәсихә менән Заһит Бирҙеғолов­тарҙың ғаиләһендә донъяға ауаз һала бөгөнгө геройыбыҙ. Татыулығы менән дан тотҡан Бирҙеғоловтар ун бер балаға ғүмер бүләк итеп, һәр береһен аяҡҡа баҫтыра. Донъяға шатлыҡ менән бағып йәшәй белгән ғаилә балаларында ла бер-береңде хөрмәтләү, тирә-яҡтағыларға иғтибарлы һәм ихтирамлы булыу, ҡулыңдан килгәнсә ярҙам итергә әҙер тороу кеүек күркәм сифаттар тәрбиәләй.
Унынсы класты тамамлағас, Ирәндек мәктәптә уҡытыусы булып эшләһә лә, ауыл хужалығы институтына уҡырға инергә хыяллана. Ике йыл армияла хеҙмәт иткәндән һуң хыялын тормошҡа ашырыу ниәте менән Өфөгә килә. Етмәһә, һөйгән ҡыҙы Әлфиә менән бер ҡалала булыу хистәре лә егеткә тынғылыҡ бирмәй. Документтарын тапшырғанда, бер белешмә ҡағыҙы етмәү сәбәпле, ауыл хужалығы институтына уҡырға алмайҙар. ҡайта һалып, килтереп еткерергә ул заманда транспорт мәсьә­ләһе ҡатмарлы була, аҡса яғы ла наҡыҫ, етмәһә, ара алыҫлығы ла бар. Ә һиңә өмөт бағлап, фатихаһын биреп ҡалған атай-әсәйеңә, туғандарыңа ни әйтерһең? Тап ошо мәлдә егеткә көтмәгәндә бәхет йылмая: яратҡан ҡыҙының бер туған апаһы медицина училищеһына барып ҡарарға кәңәш бирә. Тәүәккәл егет, оҙаҡ уйлап тормай, документтарын шунда тапшыра.
Өфөнөң был уҡыу йортона уны ҡуш ҡуллап алалар. Теш технигы бүлегенә уҡырға инә. Ике йылдан диплом алған белгесте Тамбов ҡалаһына эшкә ебәрәләр. Тик Ирәндек Заһит улының күңеле сит ерҙәрҙе үҙһенмәй, тыуған яҡҡа тартыла. Ниһайәт, 1984 йылда йәш белгес Стәрлетамаҡ балалар стоматология поликлиникаһына эшкә ҡайтарыла һәм әлеге көнгә тиклем ошонда тир түгә. “Егерме һигеҙ йыл ғүмер үткәнен һиҙмәй ҙә ҡалғанмын, матур йәшәргә, эшләргә теләк ҙур ине шул”, − ти Ирәндек Заһит улы, үткәндәрҙе барлап.
Эйе, эшен яратып башҡарған кеше генә үҙ һөнәренә тоғро ҡалалыр. ҡасандыр бер белешмә ҡағыҙы етмәгәнлектән осраҡлы рәүештә медицина училищеһына уҡырға инеүен Ирәндек Заһит улы яҙмыш бүләге тип ҡабул итә. Уның йылдар дауамында тупланған оҙайлы эш тәжрибәһе, тынғыһыҙ хеҙмәте ҡалабыҙҙа мәртәбәле баһалана. Иң тәүгеләрҙән булып “Юғары категориялы теш технигы – ортодонт” тигән маҡтаулы исемгә лайыҡ була. Белемен камиллаштырыу йәһәтенән күп уҡыған һәм яңы технологияларҙы үҙләштереп, заман менән бергә атлаған Ирәндек Заһит улының тырышлыҡ, эшһөйәрлек һәм ныҡышмалылыҡ һөҙөмтәһе был.
Эше яйлы кешенең тормошо ла бынамын тигән бара. Бер-береһен яратышып өйләнешкән Әлфиәһе менән гөрләтеп донъя көтәләр. Ике ҡыҙ үҫтерәләр. Тормош юлының һәр баҫҡысын бергә артылған һайын был ике йөрәк һәр нәмәнең ҡәҙерен белеп йәшәй. Бергә ҡоролған ғаилә ҡәлғәһе шуға ла ныҡлы, бәрәкәтле һәм ышаныслы.
Эшләгән урынында алмаштырғыһыҙ белгес, тирә-яҡтағыларына ҡарата ярҙамсыл, хәстәрлекле ғаилә башлығы, бәхетле атай, олатай Ирәндек Заһит улы “Бәхетле булыу – үҙ ҡулыңда” тигән тормош девизына һәр саҡ тоғро ҡала. “Йәшәү өсөн уңайлы шарттар тыуҙырырға ынтылаһыңмы, әллә кемдәндер көтөп ятаһыңмы, аҡса табырға тырышаһыңмы, әллә күктән яуырына өмөтләнеүеңде дауам итәһеңме, бар шатлыҡты көндәлек хеҙмәтеңдә, ғаиләңдә күрәһеңме, әллә кешенекенә көнләшеп йөрөүҙе хуплайһыңмы – үҙ ихтыярыңда, үҙ асылыңда, тормошто нисек күрә белеүеңдә”, − ти ул.
Һәр эшкә етеҙ һәм яуаплы, эшсән, ипле һүҙле, кәйефһеҙ кешенең күңелен тиҙ генә күтәреп ебәрер, тейешле һүҙен дә табыр Ирәндек Заһит улы барыһының да бәхетле булыуын теләй. “Янымда бәхетле кешеләр ни тиклем күберәк булһа, донъя шул тиклем яҡтыраҡ, тулыраҡ”, – ти ул.

Гөлдәр СОБХАНҒОЛОВА.
Рөстәм ХӘЛИМОВ фотоһы.