12.02.2019 Эндометриозды нисек дауаларға?

Күрем ваҡытында көслө ауыртыуҙан яфаланам. Табип­тарға күренгәйнем, «эндометриоз» тигән диагноз ҡуйҙылар һәм операция эшләтергә кәңәш иттеләр. Операциянан ҡурҡам, уны дауалауҙың башҡа ысулдары юҡмы икән? Кәңәш биреүсе булһа, бик шат булыр инем.
Филүзә.

Эндометриоз – киң таралған ҡатын-ҡыҙҙар ауырыуы. Әл­биттә, халыҡ медицинаһында уны дауалау буйынса кәңәштәр бар. Кемдер – ҡыяр үҫентеләренең һа­баҡтары менән, кемдер үләндәр йыйылмаһы менән дауаланырға кәңәш итә. Үҙегеҙгә оҡшағанын ҡулланып ҡарағыҙ, бәлки, файҙаһы тейер.

Баҡсанан ҡыяр үҫентеләренең кипкән һабаҡтарын йыйып алырға. 2 ҡалаҡ ваҡланған һабаҡтарға бер стакан ҡайнар һыу ҡойоп, 2 – 3 минут ҡайнатырға һәм төн­гөлөккә ултыртып торорға. Иртәгәһен һөҙөп алып, көнө буйы шуны эсергә. Әлбиттә, файҙаһы тейһен өсөн төнәтмәне бик оҙаҡ эсергә тура киләсәк, шун­лыҡтан һабаҡтарҙы ла күпләп әҙерләп ҡуйырға кәрәк буласаҡ.

Бынан тыш, икешәр ҡалаҡ йылан тамыр (шалфей) һәм алтей үләненә берәр ҡалаҡ мәрүәр ағасы (бузина) сәскәһе, ромашка, бөтнөк үләне япрағы, ҡурай еләге, меңъяпраҡ, кесерткән, ҡыр сәйе (буквица) ҡушып (кемдәрҙең ҡан баҫымы түбән, ҡыр сәйен ҡушмағанда ла була), 2 л ҡайнар һыу ҡойорға һәм 1,5 сәғәт төнәтергә. Көнөнә 4 тапҡыр ашарҙан алда ошо төнәтмәне эсергә. Ҡалғанын һиптереп йыуыныу өсөн ҡулланырға мөмкин. Шул рәүешле ике аҙна да­уаланғандан һуң 10 көн ял итергә һәм, кәрәк икән, дауаланыуҙы яңынан ҡабатларға була.