01.03.2013 Хәйерле сәғәттә, буласаҡ чемпиондар!
Өфөлә VI Халыҡ-ара ҡышҡы балалар уйындары старт алды
Урамда өйрөлөп яуған ҡарҙарҙы ҡыуған әсе ел көндө һыуытып торһа ла, баш ҡалалағы Спорт һарайының көмбәҙе аҫтында бөтөнләй башҡа кәйеф хөкөм һөрә ине. Был сараға ашыҡҡан йәше-ҡартының тулҡынланыуы йөҙҙәренә сыҡҡан. Шулай булмай ни, Рәсәй тарихында тәүге тапҡыр Өфөлә уҙған VI Халыҡ-ара ҡышҡы балалар уйындарын асыу тантанаһына шаһит булыу бәхете барыһына ла теймәй! Иҫ киткес матур биҙәлгән боҙ аренаһы тылсымлы әкиәттән күренеште хәтерләтә ине. 
Ҙур уйындарҙы 20 илдән һәм 60 ҡаланан килгән командалар парады асып ебәрҙе. Уйындар хужаһы – Башҡортостан Республикаһынан барлығы алты команда ҡатнаша – Белорет, Учалы, Стәрлетамаҡ, Октябрьский, Күмертау һәм Өфө ҡалалары спортсыларын тамашасылар айырыуса йылы алҡышланы. Әһәмиәтле сарала ҡатнашыу өсөн Халыҡ-ара балалар уйындары комитеты президенты Торстен Раш, БР Президенты Рөстәм Хәмитов, Халыҡ-ара балалар уйындары комитетының генераль секретары Ричард Смит, РФ Дәүләт Думаһының Физик культура, спорт һәм йәштәр 
сәйәсәте буйынса комитеты рәйесе Игорь Ананских, БР Дәүләт Йыйылышы – ҡоролтай Рәйесе Константин Толкачев, Өфө ҡалаһы мэры Ирек Ялалов һәм башҡа хөрмәтле ҡунаҡтар килгәйне. Артабан Рәсәй Президенты Владимир Путиндың ҡатнашыусыларға төбәп ебәргән мөрәжәғәтнамә-телеграммаһы уҡылды. Унда: ”VI Халыҡ-ара ҡышҡы балалар уйындарын ойоштороусыларҙы, ҡатнашыусыларҙы һәм ҡунаҡтарҙы сәләмләйем! 
ҡышҡы спорт төрҙәре Рәсәйҙә һәр саҡ популяр булды. Бөгөн Өфө ҡалаһы төрлө илдәрҙән һәм ҡалаларҙан иң яҡшы спортсыларҙы ҡаршы ала. Барығыҙ ҙа етди һынауҙарға әҙер, бәйгеләр ваҡытында оҫталығығыҙҙы, ихтыяр көсөгөҙҙө күрһәтерһегеҙ, тип ышанам. Тамашасыларҙы ғәҙел, матур һәм алдан килешелмәгән уйынығыҙ менән ҡыуандырығыҙ! Әлбиттә, күпселек көйәрмәндәр Рәсәй спортсылары сығышына иғтибар итәсәк. Барлыҡ атлеттарға уңыштар, ә тамашасыларға онотолмаҫ тәьҫораттар теләйем!” – тиелә.
Халыҡ-ара балалар уйындары гимны аҫтында спорт форумының флагы күтәрелеүен хөрмәтләп, барыһы ла аяҡ үрә баҫты.
– Хәйерле кис, Өфө! Барығыҙҙы ла VI халыҡ-ара ҡышҡы балалар уйындары башланыуы менән тәбрикләйем һәм уйындарығыҙҙың ғәҙел, һөҙөмтәләрегеҙҙең юғары булыуын, күтәренке кәйеф һәм уңыштар теләйем. Спорт – ул дуҫлыҡ, спорт – ул көс! – тине БР Президенты Рөстәм Хәмитов. Өфө ҡалаһы мэры Ирек Ялаловҡа, йола буйынса, VI Халыҡ-ара ҡышҡы балалар уйындары утын ҡабыҙыу бурысы йөкмәтелде. Халыҡ-ара балалар уйындары комитеты президенты Торстен Раш сараны асыҡ тип иғлан итте.
Миҙалдарҙан тыш, ә улар барлығы 56 комплект, һәр ҡатнашыусы Халыҡ-ара Олимпиада комитеты президенты ҡул ҡуйған сертификатҡа лайыҡ буласаҡ. Сөнки Халыҡ-ара балалар уйындары тап ошо ойошма ярҙамында уҙғарыла.
Әйткәндәй, VI Халыҡ-ара ҡышҡы балалар уйындары уңайынан Өфө мәктәптәре араһында “Ҙур уйын” барҙы. Унда барлығы 50-нән ашыу белем усағы уҡыусылары был оло сарала ҡатнашыу хоҡуғы өсөн көрәште. Өфөнөң Ф. Мостафина исемендәге 20-се ҡала башҡорт гимназияһы ла саранан ситтә ҡалманы. Уҡыусылар “ҡурай” исемле команда ойошторҙо, һынауҙарҙы еңел үтеп, АҡШ-тың Кливленд ҡалаһы спортсылар командаһына яуаплы булды.
– Һәр мәктәп командаһына йәрәбә буйынса халыҡ-ара балалар уйындарында ҡатнашыусы ҡалалар һәм илдәр билдәләнде. Беҙ Америка ҡатнашыусылары менән алдан бәйләнешкә инеп, интернет аша аралашып торҙоҡ һәм дуҫлаштыҡ. Ниһайәт, Кливленд делегацияһы килер көн етте! Мәктәбебеҙ хакимиәте яңы дуҫтарыбыҙ өсөн күстәнәс – бал әҙерләне, ә ҡунаҡтарҙы аэропортта башҡорт милли кейемендә, ҡурай моңо аҫтында ҡаршы алдыҡ. Беҙҙең сюрпризды күреп, туғанлашҡан дуҫтарыбыҙ йылмайып ебәрҙе, оҙаҡ осоуҙан арыған йөҙҙәре яҡтырып китте. Улар үҙ сиратында Халыҡ-ара балалар уйындары эмблемаһы менән беләҙектәрен бүләк итте, – тип һөйләй волонтер Айгөл Ишбулатова.
Ысынлап та, донъяның төрлө илдәренән спортсылар ҡатнашлығындағы саралар уларҙы берләштереүгә булышлыҡ итә. Уйындар 12 – 15 йәшлек үҫмерҙәргә дуҫлашып, артабан да аралашып йәшәргә мөмкинлек бирәсәк.
Халыҡ-ара ҡышҡы балалар уйындарын асыу тантанаһы тамамланһа ла, үҫмерҙәрҙең дуҫлығы яңы башлана ғына. Спорт һарайы алдында ап-аҡ өйөрмә булып яуған ҡар шау-гөр килеп танышҡан, фотоға төшкән, сувенирҙар менән алмашҡан, таралышырға теләмәгән балаларға һис тә ҡамасау түгел, ә киреһенсә, уларҙың шатлыҡ-ҡыуаныс хистәрен, барлыҡ сараның ихлас булмышын сағылдыра ине.
Лилиә ХӘЛИТОВА.
Юлай КӘРИМОВ фотолары.