24.04.2015 Йәш гимнастар
Байым урта мәктәбендә элек-электән спортҡа бик етди иғтибар бүленә. Ата-әсәләр ҙә балаларының физкультура дәрестәрен яратыуына, төрлө ярыштарҙа ҡатнашыуына тик ыңғай ҡарашта. Быйылғы уҡыу йылы башланыу менән, район кимәлендә уҙғарылған төрлө спорт сараларында әүҙем ҡатнаша башланыҡ. Ә бына дөйөм гимнастика буйынса ярыш районда бишенсе тапҡыр үткәрелә. Башта “Дөйөм гимнастика нимә була, бөтә төр бергә ҡушылғас, снарядтарҙа эшләү ҡайҙа була икән?” – тигән кеүек һорауҙар күп булды. Традицион гимнастиканы яңыға алмаштырыу – бер яҡтан, яңыны өйрәнеү ҡыйынлыҡтар тыуҙырһа, икенсе яҡтан, был төрҙө алып барып сығарып булырмы икән, тигән уйҙар башта ҡайнаны. Күҙ ҡурҡа, ҡул эшләй, тигәндәй, эште ҡурҡа-ҡурҡа башлап ебәрҙек. Һөҙөмтә лә оҙаҡ көттөрмәне. Балаларҙың тырышып эшләүе, музыка аҫтында ирекле күнегеүҙәр, акробатика, спорт ҡорамалдарында күнекмәләр – дөйөм гимнастиканың һәр бүлегендә ҡыҙҙар һәм малайҙарҙың һоҡланғыс сығыштары яңынан-яңы уңыштар килтереп торҙо. Район кимәлендә үткән ярышта быйыл да (бишенсе йыл!) еңеү яулап, артабан төбәк ярыштарында район намыҫын яҡлар өсөн Ейәнсураға юлландыҡ. Былтыр Стәрлетамаҡта үткән республика финал ярыштарында беренсе урын алғанлыҡтан, Иҫәнғолда ярышты асып, флагты күтәреү хоҡуғы ла беҙгә бирелде. Район балалар-үҫмерҙәр спорт мәктәбе алып биргән матур формаларҙа сығыш яһаусы өр-яңы состав уҡыусылары ла һынатманы. Йәрәбә буйынса, һәр ваҡыттағыса, беҙҙең сығыш – беренсе. Фәниә Дәүләтбаева, Дилбәр Мөхәмәҙиева, Алина Хитабуллина, Нурзиә Ғәлиәкбәрова, Камила Нафиҡова, Денис Савенюк, Илһам Шаһыбалов, Ғайсар Хәйбуллин, Айгиз Сәйетғәлин, Рәмис Таштимеров өс төрҙә лә (ирекле күнекмә, акробатик күнекмә һәм акробатик һикереү) уңышлы сығыш яһап, юғары әҙерлек күрһәтте. Денис Савенюк һәм Дилбәр Мөхәмәҙиева гимнастик һикереүҙән – беренсе, Нурзиә Ғәлиәкбәрова һәм Илһам Шаһыбалов акробатик һикереүҙән икенсе урын яуланы.
Шулай итеп, йәш гимнастар төрлө райондан килгән спортсылар араһында иң күп мәрәй йыйҙы һәмтөбәк этабында тағы ла еңеү яуланы. Алда эштәр күп. Еңеүселәр булараҡ, беҙ хәҙер Стәрлетамаҡ ҡалаһында үтәсәк финалға ныҡлы әҙерләнәбеҙ, Әбйәлил намыҫын яҡшы яҡларбыҙ тип өмөтләнәбеҙ. Бөтә яҡлап беҙгә ярҙам иткән ата-әсәләргә, мәктәп коллективына, балалар-үҫмерҙәр спорт мәктәбе хеҙмәткәрҙәренә, бигерәк тә уҡыусыларыма, физкультура уҡытыусыһы Булат Айҙар улы Хажиәхмәтовҡа, кәңәштәре һәм матди ярҙамы өсөн етәксебеҙ Ласын Марат улы Усмановҡа ҙур рәхмәтемде белдерәм.
Гөлниса ҒИЛМЕТДИНОВА,
Байым урта мәктәбенең
физкультура уҡытыусыһы.
Әбйәлил районы.