05.04.2013 ҙур спорт тирәләй

«Салауат Юлаев» «баш»лы булды

«Салауат Юлаев» клубы етәкселеге үҙенең сираттағы кәңәшмәһендә команданың баш тренеры итеп Владимир Юрзиновты тәғәйенләне.
48 йәшлек белгес, былтыр декабрь айында уға тиклем юлаевсыларҙы етәк­­ләгән Венер Сафинды отставкаға ебәргәндән һуң, ва­ҡытлыса уның урынын биләгәйне. Уның етәкселегендә «Салауат Юлаев» командаһы плей-оффта Гагарин кубогының сирекфиналына барып етеп, тигеҙ бәйгелә «Аҡ барс»тан еңелде.
Шулай уҡ юлаевсылар составында ҡапҡасы булған Вадим Тарасов, тренерҙар штабына күсеп, йәш ҡапҡасылар менән шөғөлләнәсәк. Клуб етәкселеге әйтеүенсә, әлеге составтың 80 проценты ҡаласаҡ.

Ниһайәт, Канада егетенә лә урын табылды

«Салауат Юлаев» составын плей-офф алдынан нығытҡан Канада һаҡсыһы Брент Сопел яҙмышын 2015 йылға тиклем беҙҙең команда менән бәйләмәксе.
Ул өфөләргә Новокузнец­киҙың «Метал­лург»ынан килгәйне. Сопел ко­манда составында 18 осрашыу үткәреп, дүрт тапҡыр уңыш­ҡа өлгәшә һәм өс тапҡыр гол индереүгә булышлыҡ итә.
Быға тиклем өс йыл элек ул НХЛ-дың «Чикаго Блэкхокс» клубы менән Стэнли кубогын яулай.
Ғөмүмән, Өфө клубы тарихында Канада легионерҙарының составта үҙ урынын тапҡаны булмай. Сөнки элек Сопелгә тиклем «саған япраҡтары»ның ике хоккейсыһы Өфөгә килеп уйнап ҡарай, әммә уңышһыҙ. Шуға ла, әгәр ҙә мәгәр Брент Сопел беҙҙә нығына ҡалһа, Чехия, Финляндия, Словакия легионерҙары янына Канада хокейсыһы ла ҡушыласаҡ.

«Динамо» чемпионлығын иҫбатламаҡсы

Хоккей буйынса Гагарин кубогының беренсе финалисы билдәле булды.
Былтырғы кеүек, Мәскәүҙең «Динамо»һы СКА-ны дөйөм 4:2 иҫәбенә отоп, был юлы ла чемпион исеменә дәғүә итмәксе. Санкт-Петербург командаһы миҙгел һайын эй тырыша, эй тырыша, әммә үҙенә кәрәкле һөҙөмтәгә ирешә алмай ыҙалана.
Көнсығыш конференцияһында әлегә көрәш башлана ғына. Сөнки уның еңеүсеһе тик етенсе хәл иткес уйында асыҡланасаҡ. Әле уҙған алтынсы осрашыуҙа Силәбенең «Трактор»ы үҙендә «Аҡ барс» хоккейсыларын 3:2 иҫәбенә отоп, серияны оҙайтты.

«Өфө» йәнә мәрәйһеҙ ҡалды

«Өфө» футболсылары Рәсәй беренселегенең сираттағы осрашыуын үҙ майҙанында уҙғарҙы.
Был юлы ла Игорь Колывановтың тәрбиәләнеүселәре үҙ көйәрмәндәрен ҡыуандыра алманы. Улар үҙҙәренән күпкә артта килгән Санкт-Петербургтың «Петротрест» командаһын ҡабул итте һәм унан 1:2 иҫәбенә отолоп, мәрәйҙәрен юғалтты. Хәҙер «Өфө» клубы 25 уйындан һуң 35 мәрәй менән турнир таблицаһының туғыҙынсы баҫҡысын биләй.


«Урал» плей-оффты еңеүҙән башланы

Волейбол буйынса Рәсәй беренселегенең 1/8 финалының тәүге уйынында Өфөнөң «Урал» командаһы Харьковтың «Локомотив» клубын ҡабул итте.
Бәйге өфөләр файҙаһына тамамланды. «Урал» волейболсылары ҡунаҡтарҙы өс партияла отоп (25:22, 25:23, 25:17), яуап осрашыуына күтәренке кәйеф менән сыға. Бөгөн улар Харьковта ҡабаттан уйнай.

«Торос» Братинаны үҙендә ҡалдырмаҡсы

Рәсәй беренселегенең Братина кубогы өсөн плей-офф уйындарының ярымфинал осрашыуҙары башланды.
Нефтекаманың «Торос» хоккейсылары үҙ майҙанында лига дебютанты – Воронеж ҡалаһының «Буран» клубын ҡабул итеп, ике рәт еңеү яуланы. Тәүге бәйгелә уҙған миҙгел еңеүсеһе ҡунаҡтарҙы 5:0 иҫәбенә отһа, икенсеһендә иһә, «Буран»дың ҡаршылығына осрап, минималь 4:3 иҫәбенә еңде. Киләһе осрашыу­ҙар 6, 7 апрелдә Воронежда үтәсәк. Икенсе ярымфиналда ла әлегә хужалар өҫтөнлөк итә. ҡаҙағстандың «Сарыарка» командаһы Мари Иле уйынсыларын башта 6:3 иҫәбенә отһа, икенсеһендә 4:1 иҫәбенә еңде.

Алһыу ИШМӨХӘМӘТОВА.