29.03.2011 Революцияға кем ғәйепле? буйҙаҡтар...

Рәсәйҙә үҙенең «киң» фекерҙәре менән билдәле Владимир Жириновский, Ливиялағы әлеге бола мосолман дине һәм гендер проблемалары менән бәйле, тип һанай.
Эш бында ислам идеологияһында түгел, ә һәр йомала мәсеткә йыйылыуҙа, имеш. Ир-аттың күмәкләшеп бер урынға тупланыуы иртәме-һуңмы майҙандарға сығыуға булышлыҡ итә, ти Жири­новский. «Мәсеткә йыйылған ирҙәр араһында хәбәр тиҙ тарала, улар тиҙ генә ойоша ала. Ә бына христиандар күпләп йәшәгән ерҙә улай түгел – ирҙәр сиркәүгә әҙ йөрөй, билдәле бер көндә йыйылыу ғәҙәте лә юҡ. Башҡортостан менән Та­тарстанда православие ме­нән ислам баланста «көн итә», был тыныс төбәктәрҙә төрлө конфессия вәкилдәре йәшәй. Мосолмандар күп булған Төньяҡ Кавказ иһә үҙенең тотороҡһоҙлоғон бер нисә тапҡыр күрһәтте инде», – ти Владимир Вольфович.
Эйе, сәйәсмән һаман үҙенең «репертуарында»: мо­сол­мандар «баҡсаһы»на «һиҙ­ҙермәй» генә таш ташлай.
Тағы бер фекере ғәжәпләндерә – ғәрәп илдәрендәге күтәрелештәргә демографик хәл дә йоғонто яһай, имеш. Бында өйләнмәгән ир-егеттәр бик күп. Ғаиләләре булһа, улар майҙандарға ла сыҡмаҫ ине. Буйҙаҡтарҙа агрессив холоҡ формалаша. Ғәрәп илдәрендәге болаларға, Жири­новский фекеренсә, енси проблема сәбәпсе. Үҙенең ҡеүәтен ҡатынға, балаларға арнамаған ир-егет икенсе шөғөл таба. Ярай әле Рәсәйҙә ҡатын-ҡыҙҙар күберәк, шуға ла хәл тыныс. Сәйәси «түңкәрелештәр»ҙең дә үҙ факторы бар. Ул – алкоголь. «Ил Рәсәй империяһы тарҡалғанда ла, СССР юҡҡа сыҡҡанда ла бик «яҡшы» ғына эсә ине», – тигән ЛДПР лидеры. Ул беҙҙе яҡын көндәрҙә тағы ниндәй «тос» фекерҙәре менән ҡыуандырыр икән?

А. АҡБУЛАТОВА.