17.04.2013 Төндә лә китап уҡырға мөмкин

19 апрель төнөнән 20 апрелгә тиклем Өфөлә «Библиотөн» Бөтә Рәсәй акцияһы уҙасаҡ. Сараның маҡсаты – китап уҡыуҙы йәшәү рәүешенә әүерелдереү, уҡыусыларҙы китапханаларға ылыҡтырыу, кешеләрҙә әҙәби кимәл үҫешенә булышлыҡ итеү.
Әхмәтзәки Вәлиди исемендәге БР Милли китапханаһы ла был акциянан ситтә ҡалмай – «Библиоарбат» программаһын тәҡдим итә.
Сараны Мәскәүҙәге киң билдәле Арбат урамы менән бәйләү һис тә осраҡлы түгел. Билдәле булыуынса, китапхана алды йәйәүлеләр өсөн иҫәпләнгән һәм программа ла шул майҙанда үтәсәк. Ул бик мауыҡтырғыс төҙөлгән: бында билдәле персонаждар «тереләсәк», улар менән хатта фотоға төшөү мөмкинлеге бар, бушлай уҡыу билеты алғың килһә – рәхим ит. «Мине үҙең менән ал» китап күргәҙмәһе эшләйәсәк, йәғни үҙеңә оҡшаған китапты алырға була.
«Амнистия» тип аталған сара барышында китапханаға төрлө сәбәптәр арҡаһында ваҡытында ҡайтарылмаған китаптарҙы тапшырырға була.
Ниндәй байрам йыр-моңһоҙ үтһен инде, был төндә сәнғәт академияһы, училищеһы студенттары, «Амантай» ижади үҙәге, БДУ-ның «Йәнгүзәл» ансамбле сығыш яһаясаҡ. Шулай уҡ Булат Йосопов киноклубының презентацияһы, Сергей Маджарҙың «Быуат буйлап сәйәхәт» күргәҙмәһе эшләйәсәк.
Барығыҙҙы ла күңелле «төндә» көтөп ҡалабыҙ!
Тамаша урыны: Өфө ҡалаһы, Ленин урамы, 4.
Башлана киске сәғәт 7-лә.