05.04.2013 Баш ҡаланы төҙөкләндереүгә ҙур пландар ҡоролған

Өфө коммуналь хужалыҡ һәм төҙөкләндереү идаралығы баш ҡаланы төҙөкләндереү буйынса эскиз проекттары һәм генераль пландар эшләүгә заказ бирҙе. Конкурс документацияһына ярашлы, 26 ҡала объекты яңыртыласаҡ.
Дуҫлыҡ монументы янында 33 мең квадрат метр майҙанлы «Өфө ҡәлғәһе» комплексы булдырыласаҡ. Уға ярашлы, ҡала барлыҡҡа килгән урында урынлашҡан Михайлов, Наугольный, Никольский башнялары, ҡарауыл һәм Смоленск соборҙары, ҡыңғырау манараһы, воевода йорто, приказ өйө, иген келәттәре, йәшел аҙбар, туплы ҡорал аҙбарҙары ҡороласаҡ.
Проектҡа ярашлы, Салауат Юлаев проспектындағы 19 бина буяп биҙәләсәк. Мурманск тыҡрығы һәм СССР-ҙың 50 йыллығы урамы янындағы юл үткәргес эргәһендәге ағастар художестволы яҡтыртыласаҡ.
«Нур» театры янында ҡояш сәғәте, Рус дәүләт академия драма театры эргәһендә ролледром булдырыласаҡ.
Ленин урамында, Революция урамынан алып Ибраһимов бульварына тиклемге биналар яны, Пушкин һәм Зәки Вәлиди урамдарында йәйәүлеләр зонаһы төҙөкләндереләсәк. Зәки Вәлиди урамынан Революция урамына тиклем яңы тротуар плиткаһы түшәләсәк.
И.Якутов исемендәге парк, Киров районындағы «Көньяҡ» микрорайонындағы «Таш йылға» скверы, М.Ғафури урамындағы сквер, Октябрь районындағы Клавдия Абрамованың скверы тәртипкә килтереләсәк.
Спорт һарайын һәм Конгресс-холлды генераль план буйынса төҙөкләндереү ҡаралған.