14.10.2019 Пермь халҡын башҡорт милли музыкаль ҡоралдарында уйнарға өйрәтәләр.

14-19 октябрҙә Пермь крайында Башҡорт мәҙәниәте һәм мәғрифәте көндәре үтә.

Чернушка ҡалаһында милли музыкаль инструменттар буйынса оҫталыҡ дәрестәре башланды. Йыр-моң һөйөүселәрҙе Әбйәлил районы Асҡар ауылының балалар сәнғәт мәктәбе һәм Учалы сәнғәт мәктәбе уҡытыусылары өйрәтә. Миңлегөл Солтанбаева ҡыл-ҡумыҙ һәм думбырала, ә Илгиз Йомағужин ҡурайҙа уйнау серҙәрен аса. Миңлегөл Бәхтинур ҡыҙы әйтеүенсә, теләге булһа, музыка ҡоралдарында һәр кем уйнай ала, ә профессиональ кимәлгә еткереү өсөн ныҡлап тырышырға кәрәк.

Оҫталыҡ дәрестәренә килеүселәр музыканттарҙың виртуоздарса уйынын тыңланы, уйнау техникаһы буйынса һорауҙар бирҙе, башҡорт мәҙәниәте, йолалар тураһында ла һөйләште.

Ошондай уҡ дәрестәр Пермь, Чайковский, Оса ҡалаһында, Көйәҙе ҡасабаһында, Барҙа, Ҡуян ауылдарында үтә.



Оҫталыҡ дәрестәре һөҙәмтәләре буйынса концерт ойоштороласаҡ.