16.07.2019 Әмзә урман комбинаты эшселәренә эш хаҡы буйынса бурыс август айы аҙағына тиклем түләнәсәк

Бөгөн Башҡортостан етәксеһе Радий Хәбиров эш сәфәре менән Нефтекамала йөрөй.

Тәүҙә ул Әмзә ауылына барҙы һәм ундағы урман комбинаты эшселәре Радий Фәрит улынан эш хаҡы буйынса бурыс һорауын хәл итергә һораны. Бөгөнгә предприятие үҙенең 200 хеҙмәткәренә 21,6 миллион һум эш хаҡы түләргә тейеш. Радий Хәбиров «Башҡорт урман эшкәртеү заводтары» яуаплылығы сикләнгән йәмғиәт директоры Василий Маловичко менән һөйләшкәндә август айы аҙағына тиклем Әмзә урман комбинаты эшселәренә эш хаҡы буйынса барлыҡ бурыстарҙы түләргә ҡушты. Маловичко, үҙ сиратында, компания предприятиены көрсөк хәленән сығарыу юлдарын эҙләй, өмөтлө инвесторҙар менән һөйләшеүҙәр үткәрелде тип белдерҙе.

Башҡортостан етәксеһе үҙ телмәрендә республика комбинатҡа ярҙам итергә әҙер, Төбәк фонды аша ҡорамалдар ҡайтара алабыҙ тине. Тик был осраҡта компания етәкселеге һәм конкурс идарасылары яғынан аныҡ тәҡдимдәр кәрәк.