21.05.2019 Яңы электромобиль һатыуға сыға

Өс ишекле. Дүрт кешелек. 450 мең һумлыҡ. Электрохэтчбек.

Ғашиҡ булдым да ҡуйҙымсы бынауы Zetta-ға. Тольятти ҡалаһының ошо исемдәге фирмаһы электромобиль етештерә башлай. Бәләкәй машиналар һатыуға быйыл декабрҙә сығасаҡ.

Ҡарап тороуға фантастик кинолағы транспорт һымаҡ. Үҙе килеп тороп матур күренә. Тик юлда хәүефлерәктер шул уның менән. Берәй ҙурыраҡ автомобиль төртөп кенә китһә лә, йәмшәйеп ултыраһың да ҡуяһыңмы икән? Юҡ, ундай бәхетһеҙлек юрамай торайыҡ әле.

Zetta-ның максималь тиҙлеге сәғәтенә 120 километр була. Бер зарядка менән, аккумулятор күләменә ҡарап, 200 - 560 км йөрөргә мөмкин.

Оҙонлоғо - өс, киңлеге -1,6, бейеклеге 1,7 метр самаһы. Багажник күләме - 180 литр. Тотороҡлолоҡ системаһы, кондиционеры, мультимедия системаһына сенсор экраны бар. Тәүге хаҡты 450 мең һум тип ҡуймаҡсылар. гарантия - 2 йыл (йәки 150 000 км пробег).

Быйыл 10 ғына электромобиль сығасаҡ. Киләһе йылда - 2000, артабан йылына 15 000 машина етештереләсәк. Тик нимәһе насарыраҡ, сығарылған бөтә машиналарҙың яртыһы ғына Рәсәйҙә ҡаласаҡ, ҡалғандары һатыла.

Тәүге партияһынан эләкмәҫ инде...