06.05.2019 Быйылғы чемпионат «йондоҙҙар» чемпионаты булмаҡсы

Хоккей буйынса быйылғы чемпионат бик көсөргәнешле һәм ҡыҙыҡлы булмаҡсы. Сөнки 10 майҙа Словакияла башланасаҡ донъя бәйгеһендә НХЛ «йондоҙҙары»ның ҡатнашыуы көтөлә. Беҙҙең Рәсәй командаһы составында ғына Александр Овечкин, Евгений Кузнецов, Евгений Малкин, Никита Кучеров, Илья Ковальчук, Дмитрий Орлов һәм Өфө хоккей мәктәбе тәрбиәләнеүсеһе, ҡапҡасы Андрей Василевский бар.

Башҡа ил командалары ла НХЛ хоккейсылары менән нығынды һәм нығына. Әйтәйек, АҠШ командаһы һуңғы ваҡытта тәүгә көслө состав туплаған. Улар, ниһайәт, 59 йылдан һуң чемпион исемен кире ҡайтармаҡсы. Шул уҡ Канада менән Швеция составы ла көсәйгән. Тимәк, Илья Воробьевтың тәрбиәләнеүселәренә һәм башҡаларға күңелһеҙ булмаясаҡ.

Рәсәй командаһына үҙ төркөмөндә Швеция, Чехия, Швейцария, Норвегия, Латвия, Италия һәм Австрия хоккейсылары менән осрашырға тура киләсәк.

Әлегә уның составында «Салауат Юлаев»тан Александр Кадейкин менән Владимир Ткачев күнекмәләр уҙғара. Тәүгеһе әйтмешләй, Рәсәй НХЛ уйынсыларының составҡа ағылыуы уларға беренселектә ҡатнашыу мөмкинлеген бирмәйәсәк.