12.04.2019 Башҡорт теле олимпиадаһында еңеүселәр 50 мең һум премия аласаҡ!

Радий Хәбировтың Беренсе башҡорт теле уҡытыусылары съезына тәҡдимдәрен БР мәғариф министры вазифаһын башҡарыусы Айбулат Хажин уҡып ишеттерҙе.


1. Лингвистик гимназиялар асыу. Башҡорт, рус һәм инглиз телдәрен тәрән өйрәнеү өсөн 2024 йылға тиклем Өфө, Стәрлетамаҡ, Сибай, Туймазы, Күмертау, Ишембай, Дөртөйлө ҡалаларында, Дыуан, Белорет, Әбйәлил райондарында 12 лингвистик гимназия асыу. Уларға саф башҡорт исемдәрен биреү.
2. Балаларҙы мотивациялау өсөн уҡытыу методикаһын камиллаштырыу, ҡыҙыҡлы итеү, яңы электрон технологиялары ҡулланыу, виртуаль олимпиадалар ойоштороу. Бының өсөн башҡорт теле уҡытыусыларына яңы форматтағы проект – интерактив модуль сайты булдырыласаҡ.
3. Төбәк-ара олимпиада еңеүселәренә юғары уҡыу йортона ингәндә өҫтәмә мәрәй биреү.
4. Башҡорт теле буйынса олимпиаданы Бөтә Рәсәй олимпиадалары исемлегенә индереү, (әлеге ваҡытта РФ Мәғариф министрлығы менән һөйләшеүҙәр бара).
5. Туған телдәр төбәк-ара олимпиадаһында еңеүселәргә 50 мең күләмендә БР Башлығы премияһын булдырыу.
6. “Йәйләү” лагеры өлгөһөндә төрлө райондарҙа йәйге профилле лагерҙар ойоштороу. Унда күрше өлкәләрҙән дә башҡорт балаларын саҡырыу.
7. Биш көнлөк уҡыуға күсеү сәбәпле, ата-әсәләр менән бергә этношәмбеләр ойоштороу. Унда телебеҙ, тарихыбыҙ, мәҙәниәтебеҙ, ер-һыу атамалары һәм башҡа темаға төрлө саралар үткәреү.
8. Башҡорт теле уҡытыусыларының, белгестәрҙең, методистарҙың квалификацияһын күтәреүҙе иғтибар үҙәгенә алыу. Киләһе йыл “Йыл уҡытыусыһы” һөнәри конкурсының 25 йыллығы айҡанлы, еңеүсегә 100 мең, ә финалистарға 50 мең һум күләмендә премиялар биреү.
9. Йыл һайын билдәләгән 25 иң яҡшы башҡорт һәм рус телдәре уҡытыусыларына премия күләмен 100 мең һумға тиклем арттырыу.