19.05.2017 Быйылғы ярыш тамам! Алда - киләһе ярыш!
Бөгөн, 19 майҙа Булат Солтангәрәев исемендәге республика уҡыусылар конкурсының быйылғы ярышы тамамланды. Ошо айҡанлы "Йәшлек" редакцияһында БДУ-ның журналистика кафедраһы профессоры Тимерғәле Килмөхәмәтов рәйеслегендәге баһалама комиссияһы гәзиттә сыҡҡан һәм әле баҫылып өлгөрмәгән эштәрҙе ҡараны, үҙенең ғәҙел фекерен әйтте.
Ултырышта бик ҡыҙыу бәхәстәр яңғыраны. Конкурсҡа эштәрен ебәргән егет-ҡыҙҙар үҙҙәренең ижады менән халҡым, телем, ерем, илем тип янып-көйөүселәр икәнен күрһәтте. Береһенән-береһе ҡыҙыҡлы, саф идея-фекерҙәр, төрлө юҫыҡты күрһәткән уйҙар - былар барыһы ла конкурста ҡатнашырға теләгән егет-ҡыҙҙарҙың эштәрендә төп фекер ине.
2017 йылғы бәйгелә беренсе премияны “Ҙур киләсәк алдынан” мәҡәләһе менән Наҙгөл АБДРАФИҠОВА яуланы! Ул Әбйәлил районының Байым ауылында йәшәй, 11 класта уҡый. Еңеүсе ҡыҙ оло тормош алдында тора, үҙенең эҙләнеүҙәрен, нимә борсоғанын белдерә, милләт проблемаларын әсенеп әйтә, башҡорт булыуы менән ғорурлана.
Наҙгөл шулай итеп тәрән рухлы булыуын күрһәткәне өсөн хаҡлы рәүештә беренсе урынды яуланы.
Икенсе премия ике кешегә бирелде. Тәүгеһе «Берҙәмлектә беҙҙең көс" мәҡәләһе өсөн Салауат районының Малаяҙ башҡорт гимназияһында 11-се класта уҡыған Илшат ГӘРӘЕВҠА тапшырылды. Егет мәҡәләһендәге фекерҙәрҙе килтереү ҙә етә: "...Балаға ғүмер биреү генә етмәй, ә матур исем ҡушып, туған тел тәрбиәһе биреүҙең мөһимлеген һәр ғаилә аңларға тейеш. ..киләсәгебеҙ – беҙҙең ҡулда. “Ятма, тор, уян, башҡортом!” – тип һөрән һалам... Ялағайҙар, ришүәтселәр, алдаҡсылар арта. Шуныһы ҡыҙғаныс: бөгөн ғариза яҙып та, йылдар буйы өй һалырға ер ала алмай йөрөгән йәштәр күп. Етмәһә, башҡорт халҡы ғына түгел, ә ҡалған халыҡтар ҙа үҙ ерҙәрен үҙҙәре һатып алырға мәжбүр. Меңәрләгән гектары буш ятҡанда ни өсөн ер һатыла?....
Баш ҡалалағы Ҡасим Дәүләткилдеев исемендәге республика һынлы сәнғәт гимназияһында уҡыусы Ынйыгөл ИШБУЛАТОВА бына өсөнсө йыл рәттән беҙҙең конкурста ҡатнаша. "Сабыр төбө - һары алтын" - Ынйыгөл тәүҙә лауреат исемен яулаһа, быйыл иһә икенсе премияға лайыҡ булды!
Уның "Атай абруйын һаҡлайыҡ!" мәҡәләһе ғаилә институты проблемаларына, атайлыҡ абруйын һаҡлауға, илебеҙ киләсәген ҡайғыртыуға ҡайтып ҡала.
Өсөнсө премия өс кешегә тәғәйенләнде. Улар: Әбйәлил районының Асҡар ауылындағы Т.Күсимов исемендәге гимназияның 11-се класы уҡыусыһы Илүзә МӘХЕЙӘНОВА - "Үҙ бәхетебеҙҙе аңларға ваҡыт етте", Өфөнөң Р.Ғарипов исемендәге 1-се республика башҡорт гимназия-интернатында уҡыусы Лидиә ДИНМӨХӘМӘТОВА - "Йөрәктәребеҙ - тыуған ерҙә" һәм Лилиә АЛТЫНБАЕВА үҙенең "Төнгө уйланыуҙар-һыҙланыуҙар" исемле шиғри мәҡәләһе лайыҡ булды.
Конкурсҡа ебәрелгән эштәрҙең 19-ҙы һайлап алынып гәзит битендә донъя күрҙе. Артып ҡалғандары 2018 йыл өсөн ярыш иғлан ителгәс "Йәшлек"тә донъя күрәсәк/
1,2,3 премия алыусыларҙы "Йәшлек" гәзите журналистары Һуңғы ҡыңғырау көнөндә үҙҙәре барып ҡотлаясаҡ.
“Халҡым киләсәге” номинацияһында еңеүселәрҙе айырым исемлектә әйтеп үтербеҙ.