25.01.2017 Земфира Ғәҙелшина - Юлай Мәҡсүтов исемендәге премия лауреаты!

Баймаҡ үҙәк китапханаһында яҡташыбыҙ, күренекле журналист Юлай Хөрмәт улы Мәҡсүтовтың хәтер һәм ҡәҙер кисәһенә уның туғандары, яҡындан белгән кешеләр, китапханасылар йыйылды. ”Йәшлек” гәзитенең көньяҡ райондары буйынса үҙ хәбәрсеһенең – баҡыйлыҡҡа күсеүенә ун бер йылдан ашыу ваҡыт үтеп тә киткән. Әммә беҙ уны, йәштәрҙең, ғөмүмән, ауыл эшсәндәренең тормошон, уларҙың проблемаларын бөтә асылында яҡтыртҡан үткер, ҡыйыу мәҡәләләрен һаман да онотмайбыҙ. Тиккә генә ул “Йәшлек”тең бәҫен күтәреүсе иң көслө журналистарҙың береһе булманы.
Үкенескә ҡаршы, Юлайҙың ғүмере үтә ҡыҫҡа булды, әммә башҡарған эштәре, изгелектәре менән гәзит уҡыусыларҙың күңел күгендә ҡабатланмаҫ бер йондоҙ булып мәңгелеккә уйылып ҡалды.
Тыуған яғыбыҙҙың ялҡынлы патриотының исемен мәңгеләштереү, киң мәғлүмәт саралары хеҙмәткәрҙәренең ижади әүҙемлеген күтәреү, уларҙы дәртләндереү маҡсатында Баймаҡ биләмә-ара үҙәк китапханаһы 2008 йылда Ю.Мәҡсүтов исемендәге район журналистика премияһын булдырҙы. Ошо ваҡыттан бирле был премияның лауреаттары араһында Зөлфиә Сафина, Гүзәл Иҫәнгилдина, Айгөл Иҙелбаева һәм “Атайсал” гәзитенең хәбәрсеһе Резеда Усмановалар ҙа бар.
Кисәлә комиссияның рәйесе хеҙмәт ветераны, Башҡортостан Республикаһының атҡаҙанған матбуғат һәм киң мәғлүмәт хеҙмәткәре Лилиә Фәйзулла ҡыҙы Ғәниева былай тине:
- "ЙӘШЛЕК" гәзите - газета "ЙЭШЛЕК" төркөмөнә инеп уҡып бараһығыҙҙыр, унда Юлай Мәҡсүтов менән аралашҡан, уның мәҡәләләре геройҙары булған кешеләр яҙма аҫтына фекерҙәрегеҙҙе ҡалдырығыҙ, иҫтәлектәр менән уртаҡлашығыҙ, тип яҙылғайны. Унда үҙебеҙҙең хәтирәләребеҙҙе яҙайыҡ, сөнки Юлай Мәҡсүтовты белмәгән, хәтерләмәгән кешеләр бик һирәктер.
Башҡортостандың атҡаҙанған мәҙәниәт хеҙмәткәре Луиза Дәүләтшина яҡташыбыҙ тураһында бик күп хәтирәләре менән уртаҡлашты. Премияның мөһимлеген билдәләп, маҡсатыбыҙ – Юлай Мәҡсүтов кеүек ҡыйыу, сая рухлы ҡәләм тирбәтеүселәр эҙләү, тип белдерҙе.
Ниһайәт, быйылғы лауреаттың исеме әйтелде. Ул - "Баймакский вестник" гәзите хәбәрсеһе Земфира Ғәҙелшина! Баймаҡ район хакимиәтенең беренсе урынбаҫары Гөлшат Сирғәлина лауретты ҡотлап, бәҫле һүҙҙәр, йөмәткеле хәбәрҙәр, тәрән уйлы телмәрҙәр яратҡан Юлай Мәҡсүтов рухына тап төшөрмәй эшләүен, ижад итеүен теләне. Заманында кеше тормошоноң шатлыҡтары, көйөнөстәре менән янып йөрөгән талантлы журналистың исеме беҙҙең хәтерҙәрҙә мәңге һаҡланыр.