03.04.2013 Ирәмәлдә - альпинистар ярышы

Ирәмәл тауында «Рәсәй альпинисы» нормативын үтәү буйынса республика альпиниадаһы уҙҙы. Унда ун ике команда составында 85 спортсы ҡатнашты. Улар Өфө, Ишембай, Сибай, Стәрлетамаҡ ҡалаларынан, ҡалтасы районынан, Силәбенән, ҡурған өлкәһенең Щучье ҡалаһынан килде.
Йыл да төрлө ойошма, уҡыу йорттары, спорт, туризм, альпинизм клубтары һәм секциялары, республика һәм башҡа төбәктәрҙең үҫмерҙәр үҙәктәре тәрбиәләнеүселәре нормативты үтәргә теләк белдерә. Улар миҙгел алды әҙерлеге үтә һәм махсус ҡулайламалар менән йыһазландырылған була.
Альпиниада программаһында «ҡарҙан хәрәкәт итеү һәм страховка», «ҡаялар буйлап хәрәкәт итеү һәм страховка», «тауға үрләү», «беренсе медицина ярҙамы күрһәтеү», «зыян күреүсене күсереү» темаларына уҡыу-күнекмә дәрестәре һәм һынауҙар булды.
Нормативты 66 спортсы үтәне һәм уларға «Рәсәй альпинисы» значогы тапшырылды.
Альпинизм техникаһы буйынса ярыштарҙа ҡыҙҙар һәм егеттәрҙән Евгений Исиметов, Ангелина Ғәзизова (ҡалтасы районының йыйылма командаһы), юниорҙар араһында Эдуард Рамаҙанов (Сибай), Галина Йоносова (Ишембай ҡалаһының йыйылма командаһы) еңеүсе булды. Командалар буйынса көс һынашыуҙа ҡалтасы районының йыйылма командаһы (тренеры В.Апсабиров) менән Сибай ҡалаһының «Бөркөт» физкультура-һауыҡтырыу комплексы (тренеры Д.Кәримова) беренселекте яуланы.