28.10.2019 Ашаған ризығың һаулыҡ өсөн дә файҙалы булһын

Ашағаның аш булһын, ти халыҡ мәҡәле. Һаулыҡҡа файҙаһы булһа, тағы ла яҡшыраҡ. Ниндәй ризыҡ ҡайһы сирҙән ярҙам итә икән?


Балыҡ. Йөрәк өйәнәгенә ҡаршы яҡшы дауа була ала, юғары ҡан баҫымын төшөрөүгә булышлыҡ итә. Йәйен, бағыр һәм ҡара балыҡ Д витаминына һәм омега-3 майына ифрат бай.
Кишер. Көн һайын бер кишер ашау йөрәк өйәнәген 2/3 өлөшкә кәметә. Кишерҙең күҙ өсөн дә файҙаһы ҙур.
Һарымһаҡ. Һыуыҡ тейеүгә ҡаршы яҡшы дауа. Инфекцияларҙы булдырмау өсөн көнөнә ике бүлкәт ашарға тәҡдим ителә. Бактерияларға, вирустарға һәм микробтарға ҡаршы көрәшеүсе тәбиғи антибиотик.
Сәскәле кәбеҫтә. Уның составында яман шешкә тотҡарлыҡ яһаусы каротеноид матдәһе бар. Ҡайһы бер табиптар ҡатындарға күкрәк яман шешенә ҡаршы сәскәле һәм ғәҙәти кәбеҫтә ашарға кәңәш итә.
Һуған. Ҡандағы холестерин кимәлен төшөрә. Йөрәк өйәнәге һәм яман шешкә ҡаршы яҡшы дауа була ала.
Зәйтүн майы. Юғары ҡан баҫымын төшөрә. Талаҡта таш барлыҡҡа килеү процесын тотҡарлай.
Алма. Эсәк яман шешенә ҡаршы яҡшы дауа. Мейе һәм һөйәктәр өсөн кәрәк булған матдәләргә бай. Был емештәге С витамины ауырлы ҡатындар өсөн иһә айырыуса файҙалы.
Соя борсағы. Һөйәктәрҙең ныҡлығын тәьмин итә. Тикшеренеүҙәр күрһәтеүенсә, протеинды иттән алған ҡатындар уны соя борсағынан алған ҡатындарға ҡарағанда көн һайын 50 миллиграмға күберәк кальций юғалта.
Әфлисун. С витаминына бай. Һыуыҡ тейеүҙән башлап башҡа бик күп ауырыуға дауа була ала. Әфлисун менән грейпфруттың күкрәктәге яман шеш үҫешен тотҡарлауы һәм холестеринды кәметеүе билдәле.