25.06.2019 "Айтишник"тар етмәй
Тиҙҙән Рәсәйҙә эшсе һөнәрҙәрҙең милли шорт-исемлеге төҙөләсәк. Унда ниндәй һөнәрҙәр буйынса белгестәр етмәй, шулар индереләсәк.
Бындай исемлек йәш белгестәр араһында эшһеҙлек проблемаһын кәметер ине, тип уйлайҙар. Һәм, әлбиттә, эшсе һөнәренең абруйын күтәреү өсөн дә кәрәк.
Һуңғы йылда эшселәргә вакансиялар артты. Тик йәштәр генә улар менән ҡыҙыҡһынмай. Сөнки күбеһе вузда уҡый, имеш. Нимә, әллә вуздарҙа гел чиновник булырға уҡыталармы?
Тик юғары уҡыу йортонан һуң, тәжрибәһе булмау сәбәпле, йәш белгес һөнәре буйынса эш таба алмай интегә. Ә предприятиеларға эшселәр етмәй.
Уҡыу йорттары менән предприятиелар тығыҙ бәйләнһә, бындай проблема булмаҫ ине.
Әйткәндәй, тиҙҙән хеҙмәт баҙарында квалификациялы IT-белгестәр етмәй башлаясаҡ. IT-юристар, робоэтика консультанттары, цифр продюсерҙары, интернет әйберҙәре архитекторҙары ла күпләп кәрәгәсәк.
Белегеҙ: юғары технологиялар көндән-көн үҫә, күбәйә, шуға ла ошо өлкәлә белгестәр талап ителәсәк. Әле иһә беҙҙә заман технологияларына уҡытыусылар ҙа әҙ.
IT-факультеттарҙы тамамлаусыларҙың 15 проценты ғына бөгөндән эш башларға әҙер, ҡалғандарына тағы бер аҙ өйрәнергә кәрәк икән.
Ҡыҫҡаһы: "айтишник" булһаң, эшһеҙ ултырмаясаҡһың.
Оҡшаш яңылыҡтар
