15.05.2019 «Утта янмай, һыуҙа батмай Шайморатов генерал…»

Был йырҙы белмәгән кеше юҡтыр халҡыбыҙҙа. Ҡадир Даян һүҙҙәренә Заһир Исмәғилев яҙған йыр 112-се Башҡорт кавалерия дивизияһының гимны булып киткән тиһәк, бер ҙә яңылышмаҫбыҙ. Был гимн легендар генерал Шайморатов тыуған ауылдың урамдарын йәнә яңғыратты.

Ҡырмыҫҡалы районының Шайморат ауылы халҡы, мәктәп балалары, халыҡсан радионың саҡырыуын ишетеп килгән күп һанлы ҡунаҡтар “Юлдаш” радиоһы хеҙмәткәрҙәре менән берлектә ауыл буйлап “Үлемһеҙ полк” сафтарында үтте, геройҙың һәйкәленә сәскәләр һалды, күңелдәрҙе берләштергән данлыҡлы йырҙы башҡарҙы. Бындай акциялар бик кәрәк икәненә йәнә бер инанды “Юлдаш”тар. Һуғышта ҡатнашҡан атай-олатайҙары һөйләгән тарихтар әле һаман ауыл халҡының хәтерендә. Улар быуындан-быуынға тапшырыла килә.

Акцияға Белорет районының Ҡоҙаш ауылы яугиры, һуғыш йылдарын 112-се башҡорт атлы дивизияһы сафтарында үткән Ғилметдин Әғзәм улы Әғзәмовтың вариҫтары ла ҡушылды. Улар кавалерист олатаһын иҫкә алып, хөрмәтләп, бар ғаиләһенә форма тегеп, алыҫ араға ҡарамай, илһамланып килеп еткән. Ҡаһармандың ейәне Зинаф Әхмәтшин әйтеүенсә, олатаһы ғүмере буйы арҙаҡлы комдивты иҫенә алған.

Ауыл халҡы яуҙа ҡатнашҡан ата-бабаларының хәтирәләре менән дә бүлеште. Һәр ғаиләлә Бөйөк Еңеүҙе яҡынайтыуға өлөш индергән бындай ҡаһармандар тарихы етерлек. Хәтер –мәңгелек. Халҡыбыҙ үҙ иле алдында бурысын үтәгән, уны һаҡлап алып ҡалған яугир атай-олатайҙарыбыҙҙы йышыраҡ иҫкә ала икән, тимәк, уларҙың дәһшәтле һуғышта күрһәткән батырлыҡтары бер ҡасан да онотолмаясаҡ. 74-се Еңеү яҙын ҡаршылағанда күгебеҙ һәр ваҡыт аяҙ һәм имен булыуын теләйек. Ата-бабаларыбыҙ күрһәткән батырлыҡ һәр кемдең күңелендә йәшәй. Бер кем дә, бер нимә лә онотолмаған.

“Юлдаш” радиоһы коллективы акцияны ойоштороуҙа ҡатнашҡан Ҡырмыҫҡалы районы хакимиәте вәкилдәренә, Шайморат ауыл хакимиәтенә, мәҙәниәт хеҙ­мәткәрҙәренә, мәктәп коллективына, ауыл халҡына ҙур рәхмәт еткерә. Беҙ бергә!