08.04.2016 Өмөтбайҙар "Буҙа байрамы"на йыйылды

Ике кәмәнең ҡойроғон бер юлы тотоп була икәнен белә инегеҙме? Юҡмы ни? Ә беҙҙә була! Баймаҡ районының Өмөтбай ауылында йәнә лә күркәм сара уҙҙы. 7 апрель көнө ауыл халҡы "Буҙа байрамы"на йыйылды.
Ауыл китапхансыһы Әнүзә Мәжитованың шәп тәҡдимен мәктәп коллективы ла, ауылдаштары ла дәррәү күтәреп алды. Сараның тәүге өлөшөндә милли эсемлеккә дан йырланылһа, икенсе өлөшөндә ауыл халҡы өсөн йәрминкә уҙҙы. Аяҡ аҫты бысраҡ, ер-һыу кипкәс тип тормай, сараға байтаҡ кеше йыйылды.

"Тылсымлы” магазины алдында - ауылдың ҡап уртаһында үтте байрам. Әнүзә Хажиәхмәт ҡыҙы тәүҙә буҙа тураһында әйтемдәр, мәҡәлдәр ишеттерҙе, уның файҙаһы тураһында һөйләне. Унан оло йәштәге инәйҙәр ҡулға-ҡул тотоношоп ҡаҙан эшләп баҫты. Түңәрәк эсендә бәләкәстәр һыу булып өйрөлдө. Китапханасы әйткән йомаҡтарға яуаптар биреп, “Буҙа” әҙерләнеләр. Унан мәктәп уҡыусылары концерт номерҙары күрһәтте. “Буҙа” бейеүен башҡарыусы Лүзиә Мырҙагилдина, Айгизә Ғүмәрова, Гөлнәзирә Суфийәновалар, йыры менән һөйөндөргән Ангелина Әбйәлилова, 2 һәм 4 класс уҡыусылары, һүҙ оҫталары Сания Көмөшбаева, Нәзилә Фәррәхова, Азалия Камаловаларға һәм уларҙы әҙерләгән етәкселәре Гөлсинә Рәис ҡыҙы, Зәлифә Ғәйфулла ҡыҙына байрамды биҙәгәндәре өсөн ауылдаштар исеменән ҙур рәхмәт!
Байрамдың беренсе өлөшөн йомғаҡлап, буҙа эшләп алып сыҡҡан ауылдың уңған хужабикәләрен ҡотланылар. Бына улар: Гөлбикә Көмөшбаева, Рәйсә Рәхмәтуллина, Хәтифә Баһаутдинова, Сәлимә Низамова, Венера Ғүмәрова һәм Нәғимә Ғүмәровалар. Уларҙы үҙенең бүләктәрен тапшырып, “Тылсымлы”магазины хужаһы Алгөл Латыпова ҡотлап үтте. Ошо урында йәш эшҡыуарҙар - Алгөл һәм Марсель Латыповтарҙың үҙҙәренә лә ғаилә именлеге һәм эштәренең уңын теләп үтке килә. Ауыл старостаһы Зиннур Көмөшбаев ойоштороусыларға һәм ҡатнашыусыларға рәхмәт һүҙен еткерҙе.

Икенсе өлөшөндә иһә ауылдаштар йәрминкәлә мәж килде. Берәүҙәр тауарын һатһа, икенселәр һатып алырға ашыҡты. Һатыуға сығарылған әйберҙәр араһында нимә генә юҡ: ҡырҡылған һалма, һөт аҙыҡтары, иләнгән йөн, ойоҡтар, туң сейә, еләк, ҡаҙы… Оҫтабикәләр бешергән тәмлекәстәрҙең күплеге һәм төрлөлөгө… Ә буҙа һатып алыуға ла, тәмләп ҡарауға ла бөтәһенә лә етте. Егермеләгән кеше үҙ әйберен һатыуға тәҡдим итте. Уларҙың иң бәләкәйҙәренә 7 йәш булһа, иң олоһо 8 тиҫтәне ваҡлай. Вәлимә Латыпова, Лира Ғабдуллина, Шәүрә Муллагалиевалар байрамда ҡатнашыусыларҙы самауыр ҡайнатып, тәмле сәй менән һыйланы. Ойоштороусыларға ҙур рәхмәт әйтеп, йәрминкәне инде айына ике тапҡыр үткәреп торорға тип һөйләшеп, таралышты өмөтбайҙар.
Баяғы кәмә ҡойроғона әйләнеп ҡайтҡанда, бөгөнгө көндә балаларҙың, хатта йәштәрҙең буҙа эсеп ҡарау түгел, нимә икәнен белмәгән, күрмәгән быуын үҫеп килә. Был матур сарала ойоштороусылар, инәйҙәр һәм еңгәйҙәр буҙа менән бар халыҡты һыйланы. Уны файҙалы яҡтары тураһында еткерелде. Гөлбикә еңгәй Көмөшбаева әйтеүенсә: “Хәмир эсһәң-аҡылың кәмер, буҙа эсһәң-байлығың артыр!” Эйе, был көндә аҡса эшләп тә һөйөндө инәйҙәр. Йәрминкәләрҙе йышыраҡ үткәргәндә, тәҡдим ителгән тауарҙар тағы ла төрлөләнер, күбәйер, һатыусылар һәм һатып алыусылар ҙа артыр, ә иң мөһиме балалар үҙҙәре хәләл көс менән аҡса эшләргә өйрәнер ине. Сөнки беҙҙең төп бәләбеҙ ошонда, эшләй беләбеҙ, ләкин шуны халыҡҡа еткереп, юҡтан аҡса эшләй белмәйбеҙ. Эш булмағас, аҡса юҡ инде,- тибеҙ. Ошо йәрминкәләр билдәле тәртип менән һәм даими үткәрелгән осраҡта барыбыҙ өсөн дә шәп буласаҡ! Кемдер берәү әйтмешләй-нимәнелер яҡшы эшләйһең икән-бушҡа эшләмә! Шул бөгөн, эшһеҙлек заманында, беҙҙең төп девиз булырға тейештер ул- етеш һәм яҡшы йәшәр өсөн!
Альбина Садыкова
Баймаҡ районы
Ғәзиз Садыков фотолары