07.02.2014 Өс һөйләм менән
Башҡортостан Хөкүмәте менән «Урал-Волга буйы агросәнәғәт төркөмө» йәмғиәте тирә-яҡ мөхитте һаҡлау өлкәһендәге килешеүгә ҡул ҡуйҙы. Унда ике яҡтың да тирә-яҡ мөхитте яҡшыртыу буйынса бурыстары ҡаралған. Урал-Волга буйы агросәнәғәт төркөмө 2014 – 2020 йылдарға иҫәпләнгән производствоны яңыртыу һәм заманса технологиялар индереү программаһын уйлап табырға йөкләмә алды.
Былтыр Башҡортостанда онкологик сир диагнозы ҡуйылғандарҙың һаны 11 689 кеше тәшкил иткән, был 2012 йыл күрһәткесенән ҙурыраҡ (10 953). Беренсе урында, элеккесә – һөт биҙҙәрендәге яман шеш, икенселә – үпкә рагы, өсөнсө урында – тире рагы. Республика онкология диспансерында 77 мең кеше иҫәптә тора.
Бөтә донъя башҡорттары ҡоролтайы башҡорт теле һәм әҙәбиәте буйынса белемде күтәреүҙе ойошторорға ярҙам итәсәк. Башҡарма комитеттың милли мәғариф һәм фән комиссияһы ултырышында билдәләнеүенсә, туған телде уҡытыу, бөгөнгө мәғариф проблемалары, тыуған яҡты өйрәнеүгә ҡағылышлы мәсьәләләр буйынса эште әүҙемләштереү мөһим. Әйткәндәй, комиссияның былтырғы эшмәкәрлеге ҡәнәғәтләнерлек тип баһаланған.
Республика халҡы хәҙер поезға билетты «Рәсәй тимер юлдары» (РЖД) йәмғиәтенең берҙәм мәғлүмәт-сервис үҙәге телефоны буйынса заказ биреп ҡалдырта ала. Элек бронь хеҙмәте менән Мәскәү һәм Мәскәү өлкәһе халҡы ғына файҙалана ала ине. Шылтыратыуҙар 8-800-775-00-00 телефоны буйынса ҡабул ителә.
Үткән йылдың 11 айы һөҙөмтәләре буйынса Башҡортостанда уртаса эш хаҡы, дөйөм алғанда, биш процентҡа артып, 22 мең һум булған. Бюджет хеҙмәткәрҙәренең эш хаҡы эҙмә-эҙлекле арта. Мәҫәлән, уҡытыусылар былтыр айына уртаса 23 600 һум алған.
Башҡорт дәүләт университетының компьютер филология лабораторияһында шиғри корпус барлыҡҡа килгән. Уға 20-се, 21-се быуатта ижад ителгән 17 меңдән ашыу башҡорт шиғыры һалынған. Был электрон эҙләү системаһы ҡулланыусыларҙың киң даирәһенә тәғәйенләнә.
Стәрлетамаҡта «ДревПром» компанияһы бүлексәһе етәксеһенә ҡарата «Ҙур суммала мутлашыу» статьяһы буйынса енәйәт эше асылған. Хоҡуҡ һаҡлау органдары уны финанс пирамидаһы ойоштороуҙа ғәйепләй. Тентеүҙәр «ДревПром»дың ил буйынса таралған бер нисә офисында бара.
А. АҠБУЛАТОВА әҙерләне.