27.09.2013 Хеҙмәттәшлекте нисек арттырырға?
Өфөлә яңыраҡ “Шанхай хеҙмәттәшлек ойошмаһы илдәренең хеҙмәттәшлеген күтәреү алымдары һәм стратегик йүнәлештәр: иҡтисад, экология, демография” тигән ғилми-ғәмәли конференция уҙҙы.
Был сарала Рәсәй, Ҡытай, Ҡаҙағстан, Үзбәкстан, Тажикстан, Израилдән барлығы 300 ғалим ҡатнашты. Сығыштарҙағы фекерҙәрҙең күбеһендә ШОС илдәрендәге сәйәси, иҡтисади проекттарҙы фәнни күҙлек аша үткәреү тәҡдиме хуплана. Шанхай хеҙмәттәшлек ойошмаһына ҡараған илдәрҙең төп стратегияһы – транспорт, сәнәғәт инфраструктураһын үҫтереү, логистика, сауҙа, туризм өлкәһенең мультимодель үҙәктәрен төҙөү. Ә быларҙы уңайлы яҡтан хәл итеү ғилми берекмәләрҙән башҡа мөмкин түгел. Конференцияла ҡатнашыусылар нәҡ шулай уйлай.
Урта Азияла социаль-иҡтисади хәл тотороҡло түгел, шунлыҡтан, әлеге ойошмаға ингән дәүләттәрҙең иҡтисады үҫеүен айырым-айырым ҡарауҙан бигерәк, дөйөм макроиҡтисад моделен дә уйлап табырға кәрәк. Был юҫыҡта ғалимдарға ла баш ватырлыҡ мәсьәләләр етерлек.
Сәйәси яҡтан иһә Шанхай хеҙмәттәшлек ойошмаһы илдәре хәүефһеҙлек системаһын да яңынан ҡарарға бурыслы. Бында Көнбайыш “ҡулда тоторға” теләгән Сүриә, Иран, Афғанстан проблемалары хаҡында ла оноторға ярамаҫ.
Һәр хәлдә, төрлө өлкәлә лә фекер алышаһы мәсьәләләр күп. Конференция үткәреү урыны итеп Өфө юҡҡа һайланманы – беҙҙә ике йылдан ШОС, БРИКС илдәре етәкселәренең саммиттары үтәсәк.