13.09.2013 Өс һөйләм менән
Ғинуар – июль айҙарында республикала 33909 кеше тыуған, үткән йылдың ошо уҡ осоро менән сағыштырғанда, был 1,3 процентҡа күберәк, тип хәбәр итәләр. Башҡортостандың статистика хеҙмәтенән. Ете ай эсендә 31973 кеше үлгән, 2012 йылдың ғинуар – июль айҙары менән сағыштырғанда, был 1,2 процентҡа күберәк, халыҡтың тәбиғи артыуы 2013 йылдың ете айында 1936 кешегә еткән. Миграцияның артыуы – 3260 кеше (76433 кеше килгән, 73173 кеше киткән), дөйөм алғанда, 2013 йылдың ете айында халыҡтың тәбиғи һәм миграция иҫәбенә артыуының дөйөм һөҙөмтәләре ыңғай булған һәм 5196 кеше тәшкил иткән.
«500 ферма» республика комплекслы программаһы буйыса тәүге өс тауар-һөт фермаһы файҙаланыуға тапшырылды. Уларҙың икәүһе Дүртөйлө районында, береһе Илештә урынлашҡан. Бынан тыш, төбәктә программаны тормошҡа ашырыу маҡсатында 3 млрд һумға 53 ферма яңыртылған, ике йылда 2 меңдән ашыу юғары продуктлы мал һатып алынған.
Төбәктә шәкәр сөгөлдөрөнөң уртаса уңыш ҡеүәте – 327 центнер. БР Ауыл хужалығы министрлығынан хәбәр итеүҙәренсә, 203,7 мең тонна татлы тамыр ҡаҙып алынған. Әлегә шәкәр сөгөлдөрө сәсеүсе 23 райондың 15-ендә барлығы 6,2 гектарҙа уңыш йыйылған.
Республиканың биш районында ужым культураларын сәсеү тамамланған. Дөйөм алғанда, 492 мең гектар майҙанда сәсеү эштәре бара, был – пландың 82 проценты. Шулай уҡ сәсеүлектәрҙе туңға һөрөү буйынса эштәр бара – барлығы 420 мең гектар ер эшкәртелгән.
Нефтекама ҡалаһында яңы боҙ аренаһы асылды. Ни бары ун айҙа төҙөлгән спорт комплексында урындағы спорт мәктәбе тәрбиәләнеүселәре шөғөлләнәсәк. Меценаттар үҙ аҡсаһына төҙөгән спорт һарайында яңы хоккей "йондоҙҙары"н тәрбиәләүҙе иң тәүге маҡсат итеп ҡуя.
Л. ХӘЛИТОВА әҙерләне.