09.07.2013 Бил бирмәҫ көрәшсе
Әсхәт Ямғурсинды Бөрйән баһадиры тип беләләр. Сөнки ул бына нисәнсе йыл инде Бөрйән һабантуйҙарында ал бирмәҫ көрәшсе булараҡ билдәле. Үҙе уҡыған Башҡорт дәүләт университетының физика-техник институты данын да бишенсе йыл яҡлай. Быйылғы йыл Әсхәт өсөн бик уңышлы булды: ул Ҡазан, Күмертау, Бөрө ҡалаларында, Саҡмағошта балаҫта көс һынашты. Саҡмағошта республиканан йыйылған утыҙлап көрәшсе араһында 4-се урын яулаһа, Күмертауҙа һәм Бөрөлә 1-се урын алып ҡайтты. Ә Бөрйән һабантуйында үҙенең ауырлыҡ категорияһында егеттәр булмау сәбәпле, 75 килограмм ауырлыҡтағы егеттәр менән алышты, шулай ҙа һыр бирмәне – өсөнсө урынға сыҡты. Өфөлә Ҡала көнөндә үткән ярышта 70 кг ауырлыҡ категорияһында ул тағы еңеү яуланы!
Әсхәттең буш ваҡыты юҡ: ул йә тренировкала, йә ярышта, йә эштә... Эйе, эштә. Үҙе БДУ-ла радиофизика бүлегенең 5-се курсында уҡып йөрөһә лә, Бөрйән районының Әтек ауылында йәшәүсе ата-әсәһенә көс һалмайым тип, эшләргә лә, уҡырға ла өлгөрә Әсхәт.
Әсхәт июнь айында диплом яҡланы. Унан июнь аҙағында хәрби хеҙмәткә китте. Бөрйән батыры Әсхәт Ямғурсиндың ил алдындағы бурысын үтәүҙә лә һынатмаҫына ышанабыҙ.
Земфира Аҡбутина,
РФ, БР Журналистар союзы ағзаһы.