04.06.2013 Өс һөйләм менән
6 – 7 июндә Өфөлә офтальмохирургия буйынса халыҡ-ара ғилми-ғәмәли конференция үтә. Баш ҡалаға республиканың төрлө төбәктәренән 700-ҙән ашыу табип йыйыласаҡ. Рәсәй белгестәре менән бергә, симпозиумда Украина, Үзбәкстан, Ҡаҙағстан офтальмологтары ла ҡатнашасаҡ.
Республикабыҙҙа «Тәбиғәт. Кеше. Мәҙәниәт – 2013» тип аталған халыҡ-ара акция һәм «Беҙ һинең балаларың, Ер-әсә» тип аталған фотофестиваль үтәсәк. Был саралар төрлө илдәр кешеләренә Башҡортостан менән яҡындан танышыу мөмкинлеге бирәсәк. 5 июндән 12 июнгә тиклем республика буйлап үткән аҙналыҡ фототурҙа Шанхай хеҙмәттәшлек ойошмаһына ингән илдәрҙән бик күп фоторәссам, шулай уҡ Италия, Төркиә фотографтары ла ҡатнашасаҡ.
Архангел районы үҙәгендә сыҡҡан янғында йәш ир менән ҡатын һәләк булған. Һабантуйҙан һуң өйҙә дауам иткән байрам фажиғәгә килтергән. Янғынды һуң асыҡлау сәбәпле, уларҙы ҡотҡарып ҡала алмайҙар, ә биш йәшлек ҡыҙҙары өләсәһендә булыуы арҡаһында иҫән ҡала.
Мәләүездә «Мәләүез районы йәштәре – наркотиктарға ҡаршы» тип аталған акция ойошторолдо. Унда барлығы 400-ҙән ашыу ҡыҙ һәм егет ҡатнашты. Сарала ҡатнашыусылар ҡулдарына «Беҙ сәләмәт тормош өсөн!», «Беҙ наркотиктарға ҡаршы!», «Сәләмәт тәндә – сәләмәт рух!» тигән транспаранттар тотоп, ҡаланың үҙәк урамдары буйлап үтте.
6 – 7 июндә Өфөлә халыҡ-ара экологик кинофестивале үтә. Был көндәрҙә БР Тәбиғәттән файҙаланыу һәм экология министрлығының конференц-залында республика халҡына тирә-яҡ мөхитте һаҡлау тураһында фильмдар күрһәтеләсәк. Кинофестивалдә экологик проблемалар күрһәтелеп кенә ҡалмаясаҡ, ә уларҙы хәл итеү буйынса аныҡ тәҡдимдәр ҙә буласаҡ.
Башҡортостандан Мөхәмәтйәровтар ғаиләһе «Волга буйының уңышлы ғаиләһе – 2013» конкурсында өсөнсө урын яуланы. Конкурста барлығы 25 ғаилә ҡатнашҡан. Республиканан Ғәзизовтар ғаиләһе иһә «Интернациональ ғаилә» номинацияһына лайыҡ булды.
4 – 7 июндә «Өфө-Арена» боҙ һарайында халыҡ-ара төҙөлөш форумы үтә. Уның барышында, ғәҙәттәгесә, «Ҡала. Архитектура һәм төҙөлөш» күргәҙмәһе ойоштороласаҡ. Күргәҙмәлә баш ҡаланың үҫеше һәм перспективаһына, шулай уҡ иҫке йорттарҙы һәм биналарҙы һүтеүгә бәйле һорауҙарға яуап алырға мөмкин, шулай уҡ БР Торлаҡ-коммуналь хужалыҡ министрлығы белгестәре халыҡҡа коммуналь түләүҙәр буйынса аңлатма бирәсәк.
С. ЛОТФУЛЛИНА әҙерләне.