29.03.2013 Был аҙнала беҙҙе...
Уйландырҙы...
Телевизор алдында ашау калорияларҙы ике тапҡырға күбәйтә, тип иҫәпләй ғалимдар.
Бөйөк Британия ғалимдары телевизор ҡарағанда ҡыҙҙырылған картуф, чипсы, пепси-кола кеүек калорияһы күп булған аҙыҡ-түлекте үҙеңдән алыҫыраҡ тоторға кәңәш итә. ҡыҫҡаһы, «зәңгәр экран» алдында бөтөнләй ашамауың хәйерле. Улар 14 йыл дауамында кәүҙә ауырлығын тикшереү буйынса эксперимент үткәргән һәм, телевизор ҡарағанда, китап уҡығанда, йә компьютер артында ултырғанда ашау аҙыҡтағы калорияны ике тапҡырға арттыра, тигән һығымта яһаған. Был иғтибарҙың ашауға түгел, ә башҡа нәмәгә йүнәлтелеүенә бәйле. Һөҙөмтәлә кеше күпме һәм нимә ашауына иғтибар итмәй, ашай ҙа ашай.
Аптыратты...
Тоҙҙо кәрәгенән артыҡ ҡулланыу йыл һайын 2,3 млн кешене үлтерә, тип раҫлай ғалимдар.
Күптән түгел, шәкәрле эсемлектәр йылына 200 меңгә яҡын кешенең үлеменә сәбәпсе була, тип саң ҡағалар ине, ә тоҙҙо күп ҡулланыу арҡаһында үлеүселәр һаны унан 11 тапҡыр күберәк булып сыҡҡан. Америка кардиология ассоциацияһы тикшеренеүҙәре күрһәтеүенсә, 2010 йылда үлемгә килтергән йөрәк өйәнәге һәм йөрәк-ҡан тамырҙары ауырыуҙарының 15 проценты тап тоҙҙо күп ҡулланыусы кешеләрҙә күҙәтелгән.
Көйөндөрҙө...
Перуҙа автобус тарлауыҡҡа төшөп киткән.
Киҫкен боролошта водитель руль менән идара итә алмай, машина 80 метр тәрәнлектәге соҡорға ҡолай. Һөҙөмтәлә 24 кеше һәләк булған. Йәрәхәтләнеүселәрҙе госпиталгә алып барғандар, табиптар уларҙың хәлен бик ауыр тип баһалай. Пассажирҙарҙың күбеһе – яҡын тирәләге ауылдарҙа йәшәүсе шахтерҙар. Әйткәндәй, йыл һайын Перуҙа юл-транспорт һәләкәттәрендә 3 меңгә яҡын кеше һәләк була, 50 меңгә яҡын кеше йәрәхәтләнә. Юлдарҙың һәм транспорт сараларының торошо бик насар булыуы һәм водителдәрҙең юл хәрәкәте ҡағиҙәләрен үтәмәүе быға сәбәпсе булып тора.
һөйөндөрҙө...
2014 йылда Рәсәй халҡы өсөн барлығы 119 ял һәм байрам көнө буласаҡ.
Хеҙмәт һәм халыҡты социаль яҡлау министрлығы әҙерләгән проектта ғинуарҙа, мартта, майҙа, июнь һәм ноябрь айҙарында оҙайлы ял ҡаралған. ҡышҡы каникулды улар 8 көнгә һуҙырға, мартта – ҡатын-ҡыҙҙар байрамы уңайынан өс көн ял итергә, 1 майҙа – дүрт көн, Еңеү байрамында – өс һәм июнь, ноябрь айҙарында дүртәр көн ял итергә тәҡдим итә.