26.03.2013 Донъя яңылыҡтары
Олигархтың үлеменең сәбәбен асыҡлайҙар
Бөйөк Британияла билдәле Рәсәй бизнесмены Борис Березовский 68-се йәшендә вафат булды.
Олигархтың үле кәүҙәһе 23 мартта Аскот ҡалаһы янындағы өйөндә табыла. Яҡынса күҙаллауҙарса, бер ниндәй көс ҡулланыу һәм ағыулау эҙҙәре күренмәй. Билдәле булыуынса, һуңғы ваҡытта Березовский клиник депрессия кисергән. Ошоғаса үҙенә ҡул һалған, йә булмаһа, инфаркт һөҙөмтәһендә йөрәге туҡтаған тип фаразланылар. Дуҫтарының береһе, «Аэрофлот» директорының элекке урынбаҫары Николай Глушков иһә, уны шарф менән быуып үлтергәндәр, тип иҫәпләй. Мәскәү Березовскийҙы Рәсәйҙә ерләү мөмкинлеген инҡар итмәй. РФ Президентының пресс-секретары Дмитрий Песков әйтеүенсә, был турала тәҡдим булһа, аныҡ ҡарар ҡабул ителәсәк.
Малайҙар юғала, ғәйеп кемдә?
Хабаровск крайында юғалған малай табылған.
Ульчск районы Богородское ауылынан ун йәшлек малай 23 мартта юғала. Йәкшәмбе кискеһен уның кәүҙәһен канализация ҡоҙоғонан табалар. Тәнендә йәрәхәттәр юҡ. Әле енәйәт эше ҡуҙғатылған, тикшереү алып барыла. Шул уҡ ваҡытта Амур өлкәһендә 20 мартта юғалған 9 йәшлек малайҙы эҙләү дауам итә.
Ташҡындар башланды
Ростов өлкәһендә, ташҡынға бәйле, 300-ҙән ашыу кешене эвакуациялағандар.
Дон йылғаһында һыу кимәленең кинәт күтәрелеп китеүе арҡаһында өлкәлә ундан ашыу ауыл-ҡаланы һыу баҫҡан. Һөҙөмтәлә меңләгән кеше хәүеф аҫтында ҡалған. РФ Хөкүмәте Премьер-министры Дмитрий Медведев өлкә губернаторына ташҡынға бәйле хәлде күҙәтеү аҫтында тоторға, кәрәк булған осраҡта федераль властарға ярҙам һорап мөрәжәғәт итергә ҡушҡан.
Урал тауынан алынған ҡиммәтле хазина
Свердловск өлкәһендә 1011 грамлыҡ зөбәржәт ташы табылған.
Уны Малышев ҡасабаһындағы зөбәржәт сығарыу фабрикаһы конвейерында машинист күреп ҡала. ҡара йәшел төҫтәге таш сифаты буйынса – икенсе, төҫө буйынсе беренсе сортҡа ҡарай. Урал зөбәржәте элек-электән донъяла киң билдәле. Ювелирҙар уларҙы ҡабатланмаҫ төҫө өсөн юғары баһалай.
С. ЛОТФУЛЛИНА әҙерләне.