15.03.2013 Был аҙнала беҙҙе...
Уйландырҙы...
Рәсәйҙәге хеҙмәт мигранттары рус телендә 850 һүҙҙе үҙләштерергә, текстарҙы уҡый алырға, уларҙың темаһын һәм йөкмәткеһен билдәләй белергә, шулай уҡ социаль-көнкүреш диалогтарының мәғәнәһен аңлай алырға тейеш буласаҡ.
РФ Мәғариф һәм фән министрлығы белгестәре тарафынан әҙерләнгән яңы закон проектында мигранттарға ҡарата ошондай талаптар ҡуйылған. Бынан тыш, гастарбайтерҙар фекерҙәрен рус телендә бәйләнешле итеп әйтә белергә бурыслы. Министрлыҡ нормалары буйынса, сит ил кешеһенә рус теленең нигеҙ өлөшөн белеү өсөн 1300 һүҙ етә. Ошо уға әйбер һатып алыу, йәмәғәт транспорты менән файҙаланыу кеүек иң ябай коммуникатив ихтыяждарын ҡәнәғәтләндерергә ярҙам итә.
Өмөтләндерҙе...
Испания ғалимдары Альцгеймер ауырыуы үҫешен тотҡарлаусы вакцина уйлап тапҡан.
Әлеге көндә донъяла 36 млн кеше Альцгеймер ауырыуы менән интегә. Ғалимдар иһә 2030 йылға был һандың – 66 миллионға, ә 2050 йылға 115 миллионға етеүен күҙаллай. Шуға күрә лә бөтә донъя ғалимдары кешеләрҙе был сирҙән һауыҡтырыу әмәлен эҙләй. Испанияла уйлап табылған вакцина иһә нервы туҡымаларындағы нейрондарға организмдың иммунитетына бер күҙәнәктән икенсе күҙәнәккә импульстар тапшырырға ҡамасаулаусы амилоид ҡатламдары менән көрәшергә ярҙам итәсәк. Улар фекеренсә, ЕВ – 101 вакцинаһын ҡулланыу ауырыуҙың хәлен яҡшыртып, ғүмерен ике тапҡырға оҙайтыу мөмкинлеге бирә.
Хәүефләндерҙе...
Бөтә донъя һаулыҡ һаҡлау ойошмаһы иң ныҡ эскән илдәрҙең исемлеген атаған.
Уны билдәләгәндә 2006 – 2010 йылдарҙағы статистика иҫәпкә алынған. Шулай итеп, был исемлек буйынса өсөнсө урында Эстония килә. Ә иң ҡурҡыныс хәл – Молдавия менән Люксембургта. Эстонияла йылына йән башына 15 литр таҙа этанол ҡулланалар. Рәсәй иһә исемлектең урта тирәһендә. Беҙҙә йылына йән башына яҡынса 10 литрҙан ашыуыраҡ иҫерткес эсемлек тура килә. Иң айыҡ илдәр – Тажикстан менән Төркиә. Норвегия, Швеция, Исландия ла исемлектең аҙағында тора.
һөйөндөрҙө...
Легендар «Ласковый май» төркөмөнөң элекке солисы Юрий Шатунов икенсегә атай булған.
Уның ҡатыны Светлана Германияның Бад-Хомбург ҡалаһында ҡыҙ тапҡан. Сабыйҙың буйы – 54 см, ауырлығы 4200 г. ҡыҙға ата-әсәһе Эстелла тип исем ҡушырға булған. Белеүебеҙсә, Юраның Денис исемле улы бар.