05.02.2013 Башҡортостанды танытыу өсөн
Мәскәүҙә Башҡортостан Хөкүмәте менән Бойондороҡһоҙ Дәүләттәр Берләшмәһе, сит илдәрҙә йәшәгән ватандаштарыбыҙ эштәре һәм халыҡ-ара гуманитар хеҙмәттәшлек буйынса федераль агентлыҡ араһында килешеү төҙөлдө. Документҡа “Россотрудничество” агентлығы етәксеһе Константин Косачев һәм Башҡортостан Президенты Рөстәм Хәмитов ҡул ҡуйҙы.
Килешеүсе яҡтар сит илдәрҙә йәшәгән яҡташтарға һәм уларҙың берләшмәләренә ярҙам итеү буйынса программа һәм проекттарҙы бойомға ашырыу, улар менән бәйләнеш булдырыу, Башҡортостандың халыҡ-ара хеҙмәттәшлек итеүенә булышлыҡ итеү, уның халыҡ промыслаларын Рәсәйҙән ситкә сығарыу, республикала урынлашҡан уҡыу йорттарының белем биреү хеҙмәттәрен экспортлауға булышлыҡ итеү кеүек йүнәлештәр буйынса хеҙмәттәшлек итеү тураһында һөйләште.
БДБ эштәре буйынса федераль агентлыҡ сит илдәрҙәге вәкиллектәрендә Башҡортостан тураһында төрлө материал таратасаҡ, сит илдәрҙә күргәҙмәләр, презентациялар, фестивалдәр, гастролдәр, конференциялар, семинарҙар үткәреүгә булышлыҡ итәсәк. Ә Башҡортостан Хөкүмәте, үҙ сиратында, федераль агентлыҡ менән берлектә үткәрелгән сараларҙа (шул иҫәптән сит илдәрҙә йәшәгән яҡташтарға ярҙам итеү сараларында) ҡатнашырға, сит илдәрҙәге музейҙар, китапханалар, архивтар һәм уҡыу йорттары менән хеҙмәттәшлек итеүҙе үҫтерергә, агентлыҡтың ойоштороу эшмәкәрлегендә ҡатнашырға тейеш.
Рөстәм Хәмитов белдереүенсә, был беҙҙең республика өсөн бик мөһим ваҡиға. Беҙ инвесторҙар йәлеп итәбеҙ, сит илдәр менән бәйләнештәр булдырабыҙ, ошо йәһәттән агентлыҡтың ярҙамы әһәмиәтле. Илде һәм республикабыҙҙы сит илдәрҙә лайыҡлы күрһәтеү өсөн бер-беребеҙгә ярҙам итеп, бергәләп эшләргә тейешбеҙ.
Әйткәндәй, федераль агентлыҡ 74 илдә эшләй, Рәсәй субъекттары менән дә хеҙмәттәшлек итеү тураһында йылдан-йыл күберәк килешә. Мәҫәлән, былтыр ғына Тува, Адыгея, Татарстан, Сыуашстан Республикалары, Төмән, Курск, Тамбов өлкәләре, Мәскәү, Санкт-Петербург ҡалалары хөкүмәттәре менән килешеүҙәр төҙөлгән.