16.10.2012 Өс һөйләм менән
Ял көндәрендә Башҡортостандың ҡала-райондарында сираттағы ауыл хужалығы йәрминкәләре үтте. Был көндәрҙә республиканың 73 сауҙа майҙанында биш меңдән ашыу һатыу нөктәһе һәм өс мең тирәһе автокибет булдырылды. Йәрминкәләрҙә 3198,3 мең тонна картуф, 923,4 тонна һуған, 603,6 тонна кәбеҫтә, 218,5 тонна кишер, 148 тонна һыйыр ите һәм башҡа бик күп ауыл хужалығы тауары һатылды.
Бөгөн республиканың урта белем биреү мәктәптәре өр-яңы 14 автобус асҡысын ала. Башҡортостан Республикаһының Мәғариф министрлығынан алынған мәғлүмәттәр буйынса, беҙҙең ауыл мәктәптәренә автобустар алыу өсөн быйыл федераль бюджеттан 200 миллион һумдан ашыу аҡса бүленгән. Ошо аҡсаға мәктәптәргә 98 автобус алынған, техника балаларҙы мәктәпкә генә түгел, ситтә үткәрелгән конкурстар, экскурсияларға йөрөтөү өсөн дә файҙаланылырға тейеш.
Бөгөн Башҡортостандың төҙөлөш тармағы өсөн мөһим мәсьәлә − кадрҙар проблемаһы килеп тыуған. Йылдан-йыл күберәк торлаҡ төҙөп, әүҙем тапшырыу өсөн квалификациялы кадрҙар талап ителә, ә йәштәр был эшкә бармай. Шулай уҡ төҙөүселәрҙе әҙерләүсе уҡыу йорттарына инергә теләүселәр һаны йылдан-йыл кәмей, йәштәрҙе был тармаҡта эштең ауырлығы ҡурҡыта.
ҡариҙел районында “Рәсәй почтаһы”ның автомашинаһын таларға маташҡандар. Абыҙ ауылы эргәһендә билдәһеҙ өс кеше, йөҙҙәрен ҡаплап, УАЗ автомашинаһы шоферына әлегә билдәләнмәгән ҡоралдан атҡан. Енәйәтселәрҙең машинанан аҡса эҙләүе билдәле, машинала китеп барыусыларҙың икәүһе лә яраланған.
Бөрө ҡалаһында полиция хеҙмәткәрҙәре ҡайҙа әҙерләнгәне билдәһеҙ булған алкоголь продукцияһын һатыусыларҙы ҡулған алған. Енәйәтселәр ярты литрлыҡ 20 мең шешә спиртлы эсемлекте машинаға тейәп, Пермь ҡалаһына алып китеп барған. Әлеге ваҡытта шешәләрҙәге эсемлектең сифаты, ҡайҙа әҙерләнгәне тикшерелә, йөк ваҡытлыса аресҡа алынған.
Асҡын районында бер урман хужалығының элекке башлығы тәбиғәткә зыян килтергәне өсөн ике йыл буйы һәр ай һайын 20 мең һум штраф түләп барасаҡ. Был кеше, вазифаһын үҙ мәнфәғәтендә файҙаланып, шул район кешеһе исеменән урман һатыу буйынса ялған килешеү төҙөгән. Шулай ҙа был ялған асыҡланған һәм элекке башлыҡ язаға тарттырылған.
Л. СИРАЕВА әҙерләне.