10.02.2012 Өс һөйләм менән
Күмертауҙа авария хәлендәге торлаҡта йәшәгән 63 ғаиләгә яңы йорттағы фатир асҡыстары тапшырылды. Торлаҡ-коммуналь хужалыҡты реформалауға булышлыҡ итеү фондынан хәбәр итеүҙәренсә, улар өсөн ҡалала ике йорт төҙөлгән. Быйыл да Күмертауҙа биш йорттан граждандарҙы күсереү һәм йәнә 40 ғаиләгә яңы фатир биреү планлаштырыла.
Башҡортостандың Ауыл хужалығы министрлығынан хәбәр итеүҙәренсә, тракторҙарҙың яҙғы сәсеү эштәренә әҙерлек кимәле 82 процент тәшкил итә. Әлеге ваҡытта 1870 «тимер ат»ҡа ремонт үткәрелә. Сәсеү комплекстары сәскестәренең – 78, культиваторҙар, дискылы тырмаларҙың – 80, һабандарҙың 87 проценты әҙер.
Рөстәм Сабитов Башҡорт дәүләт опера һәм балет театрына етәксе итеп тәғәйенләнде. Ул − Рәсәйҙең һәм Башҡортостандың атҡаҙанған сәнғәт эшмәкәре, Салауат Юлаев исемендәге дәүләт премияһы лауреаты, Рәсәй Композиторҙар союзының почетлы ағзаһы. Ул күренекле башҡорт композиторы һәм дирижеры Нариман Сабитовтың ғаиләһендә Өфөлә тыуған.
Республикала «Байыҡ – 2012» башҡорт бейеүен башҡарыусылар конкурсы старт алды. Мәсетле районының Оло Ыҡтамаҡ ауылында «Байыҡ – 2012» конкурсының беренсе һайлап алыу туры үтте. Бәйгенең финалында сығыш яһау хоҡуғы өсөн Балаҡатай, Дыуан, ҡыйғы, Мәсетле һәм Салауат райондары, шулай уҡ Силәбе өлкәһе бейеүселәре көс һынашты.
Башҡортостандың Архитекторҙар йортонда «2011 йылдың иң яҡшы проекты» республика архитектура күргәҙмәһе асылды. Унда төбәктең профессиональ архитекторҙары һәм профилле уҡыу йорттары студенттары ҡатнаша. Күргәҙмәгә йәмғеһе 70 эш ҡуйылған, уның барышында конкурстар ҙа ойоштороласаҡ.
Өфөлә М. Аҡмулла исемендәге Башҡорт дәүләт педагогия университеты көндәре үтә. Сарала юғары уҡыу йорто вәкилдәре уҡытыусылар, уҡыусылар һәм уларҙың ата-әсәләре менән осраша. Вуздың матбуғат үҙәгенән хәбәр итеүҙәренсә, был – социаль акция, сөнки уҡытыусылар һәм уҡыусылар өсөн дәрестәр, берҙәм дәүләт имтихандарына һәм дәүләт (йомғаҡлау) аттестацияһына әҙерлек, юғары уҡыу йортона уҡырға инеү мәсьәләләре буйынса квалификациялы консультациялар бушлай үткәрелә.
С. ЛОТФУЛЛИНА әҙерләне.