03.02.2012 Арбитраж управляющийҙарҙың эшмәкәрлегенә контролде көсәйтеү зарур
Рөстәм Хәмитов Республика йортонда предприятиеларҙы финанс яғынан һауыҡтырыу һәм банкротлыҡҡа сығыуҙан ҡотҡарыу буйынса эштең йоғонтолоғон күтәреүгә арналған кәңәшмә үткәрҙе.
– Баҙар шарттарында ҡайһы бер предприятиеларҙың банкротҡа сығыуы ҡотолғоһоҙ хәлгә әйләнә. ҡыҙғанысҡа ҡаршы, был хәл беҙҙә мөлкәт бүлеү ҡоралына әйләнде: уңышлы эшләп килгән, әммә кемделер «ҡыҙыҡтырған» предприятиеларҙы банкротлаштыралар. Йыш ҡына уларҙың мөлкәтен таратып алалар, ә эшселәре урамда тороп ҡала, – тине Президент. – Килемле эшләгән предприятиелар һаны буйынса Башҡортостан тәүге урынды биләй. Шул уҡ ваҡытта республика банкротланған предприятиелар иҫәбе буйынса ла алда бара, – тип ул был йәһәттән аныҡ һандар килтерҙе һәм былай тип өҫтәне. – «Банкротлыҡ тураһында»ғы Федераль закон предприятиены көрсөктән сығарыу буйынса саралар исемлеген билдәләй. Уларҙың иң мөһиме – финанс яғынан сәләмәтләндереү. Маҡсат асыҡ – предприятиеның рентабелле эшен тәьмин итеү, уның бизнесын һәм эш урындарын һаҡлап ҡалыу. Тик бындай эш ғәмәлдә башҡарылмай. Тимәк, банкротлаштырыу криминаль бизнесҡа әйләнгән.
Бурыслы предприятиеның түләүгә һәләтлеген тергеҙеүгә икенсе процедура булышлыҡ итергә тейеш – ситтән идара итеүҙе индереү. Тик был да һирәк файҙаланыла. Президент һүҙҙәренсә, республикала ошо йәһәттән эш бөтөнләй алып барылмай. Икенсе яҡтан, предприятиеларҙың хәлен яҡшыртыуға дәүләт органдары – һалым хеҙмәте, прокуратура, башҡарма власть органдары мәнфәғәттәренең конфликты ла ҡамасаулай. Республика властары, урындағы үҙидара органдары арбитраж управляющийҙарҙы тәғәйенләүгә лә, кредиторҙар йыйылыштарында ҡабул ителгән ҡарарҙарға ла йоғонто яһамай.
Республика финанс яғынан һауыҡтырыу һәм банкротлыҡ өлкәһендәге эштең йоғонтолоғон күтәреү буйынса ведомство-ара комиссияһы ағзалары ошо юҫыҡта килеп сыҡҡан һорауҙарға бергәләп яуап эҙләне. Комиссия рәйесе – БР Президенты Хакимиәте етәксеһе Владимир Балабановтың отчеты Рөстәм Хәмитовта ҡәнәғәтһеҙлек тыуҙырҙы. ҡыҙғанысҡа ҡаршы, кемгә яза бирелгән, кемдең яуаплылыҡҡа тарттырылыуы тураһында һүҙ булманы, тине ул.
Был мәсьәләләр буйынса сығыш яһаусыларҙың барыһының да тәҡдиме – арбитраж управляющийҙарҙың эшмәкәрлегенә контролде көсәйтеү.