20.01.2012 Милләтте сәләмәтләндереү – көнүҙәк мәсьәләләрҙең береһе
Республикабыҙға ошо көндәрҙә Рәсәй Президентына кандидат Владимир Путинға ярҙам итеү буйынса үҙәк халыҡ штабының мобиль төркөмө ағзаһы булараҡ килгән Милли медицина палатаһы президенты, Ашығыс балалар хирургияһы һәм травматологияһы ғилми-тикшеренеү институты директоры Леонид Рошаль Башҡортостандың медицина активы менән осрашыуының төп темаһын «Һаулыҡ һаҡлау өлкәһен үҙгәртеп ҡороуҙа граждандар йәмғиәтенең роле» тип билдәләне.
Доктор Рошаль республиканың медицина йәмәғәтселегенә Милли медицина палатаһы ҡатнашлығында әҙерләнгән һәм Рәсәй Президентына кандидат Владимир Путиндың һайлау алды программаһын формалаштырыуға нигеҙ итеп алынған Бөтә Рәсәй халыҡ фронтының «Халыҡ башланғыстары» программаһының бер өлөшө булып торған «Сәләмәт милләт» программаһын тәҡдим итте.
Леонид Рошаль, үткән быуаттың 90-сы йылдарындағы, 2000 йылдар башындағы һәм хәҙерге этаптағы хәлде анализлап, йәмғиәтебеҙҙең төрлө өлкәләге аныҡ ҡаҙаныштарына туҡталды. Төп проблемаларҙы һәм уларҙы хәл итеү юлдарын билдәләп, ул Рәсәйҙең һаулыҡ һаҡлау өлкәһенең хәҙерге торошона айырым иғтибар биреүҙәрен һораны. Леонид Рошалдең фекеренсә, медиктар берләшмәһе менән биш йыл элек әүҙем тикшерелгән Рәсәй һаулыҡ һаҡлау системаһын үҫтереү концепцияһының һаман ҡабул ителмәүе Ватан медицинаһының йылдам үҫешеүенә етди кәртә булған. Шуға күрә РФ Дәүләт Думаһының һаулыҡ һаҡлау өлкәһенә ҡағылышлы закондарҙы ҡабул итеүе, ҡағиҙә булараҡ, медицинаның практик ихтыяждарына яуап биреүсе бихисап төҙәтмә менән оҙатылып килә. Һәм бында граждандар йәмғиәте институттары, медицина хеҙмәткәрҙәренең йәмәғәт берекмәләре ҙур роль уйнай. Быйыл көсөнә ингән «Рәсәй Федерацияһының һаулыҡ һаҡлау нигеҙҙәре тураһында»ғы Федераль закон менән дә шулай килеп сыҡҡан. Доктор Рошалдең билдәләүенсә, табиптар берлегенең ныҡышмалылығы арҡаһында уға 109 төҙәтмә индерелгән.
Асыҡ диалог форматында үткән осрашыуҙа медицина ярҙамы күрһәтеү стандарттарынан, эш хаҡынан һәм медицина хеҙмәткәрҙәренә социаль ярҙамдан башлап һаулыҡ һаҡлау өлкәһендәге вәкәләттәрҙе муниципаль берәмектәргә тапшырыу, профилактик медицинаны үҫтереү, предприятиеларҙа һаулыҡ һаҡлауға тиклем Рәсәйҙең һаулыҡ һаҡлау өлкәһен үҙгәртеп ҡороуҙың төрлө аспекттары тикшерелде. Леонид Рошалдең үтенесе буйынса, бөтә һорауҙар ҙа теркәлеп, артабан тикшереү өсөн уға тапшырылды. Уның әйтеүенсә, властарҙың иғтибарын яҡын арала тап ошо мәсьәләләргә йүнәлтергә кәрәк буласаҡ.