27.08.2011 Был аҙнала беҙҙе...
Аптыратты...
Иран Рәсәйҙе уларға С − 300 зенит-ракета комплекстарын һатыуҙан баш тартҡаны өсөн халыҡ-ара судҡа бирмәксе.
«Ике яҡлы мөнәсәбәттәрҙең быға тиклем дуҫтарса булыуын иҫәпкә алғанда, Тәһран властарының был аҙымы бик аптыратты», − тиҙәр беҙҙең Сит ил эштәре министрлығында. Эш шунда: 2007 йылда уҡ ракеталарҙы һатыу тураһында килешһәләр ҙә, уны бойомға ашырып өлгөрмәйҙәр, былтыр БМО-ның Именлек Советы Иранға ҡарата бер нисә санкция индергәндә «ҡара исемлек»кә тап ошо С−300 зенит-ракеталары ла эләгә. БМО ҡарарына ҡаршы килеп булмай ҙа инде. Ирандың Рәсәйҙәге илсеһе Мәхмүт Реза Саджади фекеренсә, был суд, киреһенсә, Рәсәйгә файҙа килтерәсәк. Килешеү бит Именлек Советы резолюцияһынан күпкә алда төҙөлгән. Шулай ҙа ирандарҙың суд юлын һайлауы ғына аңлашылмай.
Йылмайтты...
Төрлө рейтингылар төҙөү менән билдәле «Форбс» сираттағы исемлеген тәҡдим итте.
Был юлы унда донъяның иң йоғонтоло ҡатын-ҡыҙҙары һайланған. Исемлектең башында − Германия канцлеры Ангела Меркель. Уның «артында» АҡШ-тың дәүләт секретары Хиллари Клинтон килә. Бразилия Президенты Дилма Руссефф − өсөнсө баҫҡыста. Тәүге бишәүгә шулай уҡ «PepsiCo» компанияһының генераль директоры Индра Нуйи менән «Facebook»-тың операциялар буйынса етәксеһе Шерил Сандберг ингән. Юҡ, бында беҙҙекеләр юҡ. «Форбс» быйыл да Рәсәйҙә донъя өсөн «текә» ҡатын-ҡыҙ тапмаған.
ҡыуандырҙы...
Киләһе йылда беҙ 118 көн ял итәсәкбеҙ.
Ил етәкселеге халыҡты шулай тип ҡыуандыра. Ғәҙәттәгесә, Яңы йыл байрамдары барыһынан да оҙайлыраҡ буласаҡ − 1− 9 ғинуар. Тағы ла йыл дауамында өсәр көнләп бер нисә тапҡыр ял итәсәкбеҙ. Был көндәр мартта, апрель – майҙа, июндә һәм ноябрҙә буласаҡ. 23 февралдә генә бер көн байрам итеү күҙаллана. Йылда 365 көн барлығын иҫәпкә алып, ял һәм байрам көндәрен бергә һанаһаҡ, ысынлап та, киләһе йылдың ял итергә яратыусыларға уңайлы булыуын күрәбеҙ.
Асыуландырҙы...
Мәскәү патруль-пост хеҙмәтенең ике хеҙмәткәре кеше талауҙа ғәйепләнә.
Тихорецк бульварының бер йорто ихатаһында старшина менән сержант бергә эсеп алғандан һуң «батырлыҡ» ҡылырға теләй. Урамда бер ирҙе туҡтатып, бәйләнә башлайҙар. Бейсбол биталары менән ярайһы туҡмағандан һуң ирҙең кеҫәһенән... бер миллион да ете мең һум аҡса табып алалар. Теге меҫкен фатирын һатҡан булған, имеш. Хәҙер инде ул асарбаҡ тип иҫәпләнә. Тиҙҙән ике полицейский ҙа тотола. Улар эшләгән бүлектә ентекле тикшереүҙәр башланған. Исемде үҙгәртеүҙән есем үҙгәрмәй, тиеүҙәре дөрөҫтөр − реформаның әлегә бер ниндәй ҙә һөҙөмтәһе күренмәй.