18.06.2011 Эшҡыуарҙар республика башлығын фронтҡа тәҡдим итте

«Эшлекле Рәсәй» йәмәғәт ойошмаһының Башҡортостан төбәк бүлексәһе «Халыҡ фронты»на кандидаттар исемлегенә БР Президенты Рөстәм Хәмитовты индергән.
Ойошма ағзалары фекеренсә, республика етәксеһе эшҡыуарҙар мәнфәғәтен төп ҡайғыртыусы һанала, ул килеү менән төбәктә инвестиция климаты ла яҡшы яҡҡа үҙгәргән. Президенттың эшҡыуарлыҡ өсөн мөһим булған асыҡ сәйәсәт алып барыуы ла «Эшлекле Рәсәй» ағзаларын ҡәнәғәтләндерә. Рөстәм Хәмитовтан тыш, кандидаттар исемлегендә Өфө дәүләт иҡтисад һәм сервис академияһы ректоры Александр Дегтярев, БР Эшҡыуарлыҡ ойошмалары ассоциацияһы советы рәйесе Алексей Щербацкий һәм «Рәсәй терәге» ойошмаһының төбәк бүлексәһе рәйесе Денис Мусин да бар.

Әйткәндәй

Йәмәғәт ойошмалары, сәйәси фирҡәләр эшмәкәрлеге темаһын дауам итеп, «Берҙәм Рәсәй» партияһының төбәк сәйәси советы секретары Константин Толкачевтың сираттағы ултырыштағы сығышы хаҡында телгә алып китмәү мөмкин түгел. Фирҡәлә ағза булып торһалар ҙа, уның эшендә ҡатнашырға теләмәүселәр бар, тигән фекерен еткерҙе ул. Ойошма йыл һайын тиерлек «үле йәндәр»ҙән ҡотолоп тора, был эш тағы ла көсәйтеләсәк.
«Йәштәргә ҙур өмөт бағлайбыҙ, – тине Толкачев. – «Йәш гвардия» эшен дә әүҙемләштерергә кәрәк. Был ойошманың ячейкаһы һәр вузда, техникумда һәм колледжда, һәр ауылда булырға тейеш. Йәштәр – беҙҙең ресурс». Константин Борисович әйтеүенсә, «Берҙәм Рәсәй» – йәштәргә уй-ниәттәрен бойомға ашырырға йүнәлеш биреүсе ул.