22.11.2013 Үҙебеҙҙекеләрҙе беләйек

Башҡортостан предприятиеларының 35 продукцияһы һәм хеҙмәтләндереү төрө “Рәсәй­ҙең иң яҡшы 100 тауары” Бөтә Рәсәй конкурсында – лауреат, тағы ла 66-һы дипломант булды.
Федераль этапҡа республиканың 58 предприятиеһы сыҡҡан. Был хаҡта БР Стандартлаштырыу, метрология һәм сертификатлау дәүләт төбәк үҙәге хәбәр итә.
«Производство-техник тәғәйенләнештәге продукция» номинацияһында Баш­ҡортостан предприятиелары 13 юғары награда менән билдәләнде. Был сегментта Рәсәйҙең иң яҡшы тауарҙары араһында «НефАЗ» йәмғиәтендә етеш­терелгән ярым тағылма-цистерна, «Учалы тау-байыҡтырыу комбинаты» йәмғиәтенең баҡыр концентраты, «Баш­нефть» компанияһының «Ре­гуляр – 92» маркалы бензины һәм башҡа тауар­ҙар бар.
Башҡортостан даими алдынғы урындар яулаған тағы бер номинация — «Аҙыҡ-түлек тауарҙары». Бында 15 продукция өлгөһө – лауреат, 30-ы дипломант исемен алды. Еңеүсе тауар­ҙар араһында – ит, һөт, икмәк аҙыҡтары, шулай уҡ «Башспирт» йәмғиәте продукцияһы. Ә иң күп диплом­ға «Рощинский» совхозы лайыҡ булды.
Халыҡ өсөн иң яҡшы сәнәғәт тауарҙарын, комиссия фекеренсә, «Европ­ласт», «Өфө кизе-мамыҡ комбинаты», «БашИнком» йәмғиәттәре етештерә.
«Халыҡ һәм художество промыслалары изделиелары» номинацияһында «Ағи­ҙел» предприятиеһының «Сармат» тигән яңғырауыҡлы исем аҫтындағы ирҙәр милли костюмы диплом менән бүләкләнде.
«Халыҡ өсөн хеҙмәттәр» номинацияһы «Башҡор­тостан» ҡунаҡханалар комплексына, кардиологик ауырыуҙарҙы реабилитациялау буйынса «Йәшел сауҡалыҡ» шифаханаһына бирелде.
Иң яҡшы «Производство-техник тәғәйенләнештәге хеҙмәттәр»ҙе «ВНЗМ» ак­ционерҙар компанияһы һәм «БР Нефть-химия эшкәртеү институты» күрһәтә.
Әйткәндәй, беренсе тапҡыр «Рәсәйҙең иң яҡшы 100 тауары» конкурсы 1998 йылда үткәйне. Шунан алып республиканың 350 предприятиеһы лаурет булған, 700-ҙән ашыуы финалға сығып, дипломдар алған.