27.09.2013 Республиканың яңы парламенты эш башланы

Ошо аҙнала БР Дәүләт Йыйылышы – Ҡоролтайҙың бишенсе саҡырылыш депутаттары яңы парламенттың тәүге ултырышын ойоштороуға бәй­ле кәңәшмә үткәрҙе.
Әле һайланған депутаттар араһында төрлө ҡатлам һәм һөнәр вәкилдәре бар. Һандарға күҙ һалғанда, парламентарий­ҙар араһында 27 предприятие һәм ойошма етәксеһе, 30 урта һәм бәләкәй эшҡыуарлыҡ вәкиле бар. Бынан тыш, дәүләт һәм муниципаль власть органдары хеҙмәткәрҙәренән – 15, фән һәм мәғарифтан – 12, һаулыҡ һаҡлау өлкәһенән – 7, мәҙәниәт һәм спорттан – 5, киң мәғлүмәт сараларынан, хоҡуҡ һаҡлау органдары һәм адвокатуранан 4-әр кеше депутат булып һайланған. 15 депутат – фән докторы, 19-ы – фән кандидаты.
Алдан хәбәр итеүебеҙсә, был саҡырылыш күп партиялы. Тауыш йыйыу буйынса ете процентлыҡ барьерҙы үткән ике партияның – “Берҙәм Рәсәй” менән Коммунистар партияһының ‒ фракциялары эшләйәсәк.
Тәҡдимдәр буйынса парламентта һигеҙ даими комитет буласаҡ. Улар: Дәүләт ҡоролошо, хоҡуҡи тәртип һәм суд мәсьәләләре;
Урындағы үҙидара, гражданлыҡ йәмғиәте һәм киң мәғлүмәт саралары;
Бюджет, һалым, инвестиция сәйәсәте һәм территориаль үҫеш;
Сәнәғәт, инновацион үҫеш һәм эшҡыуарлыҡ;
Торлаҡ сәйәсәте һәм инфраструктура үҫеше;
Аграр мәсьәләләр, экология һәм тәбиғәттән файҙаланыу;
Мәғариф, мәҙәниәт, спорт һәм йәштәр сәйәсәте;
Һаулыҡ һаҡлау, социаль сәйәсәт һәм ветерандар эше буйынса комитеттар.
Әлеге кәңәшмәлә БР Дәүләт Йыйылышы – Ҡоролтай етәкселеге структураһы буйынса ла һөйләшеүҙәр булды. Беренсе ултырыш 3 октябргә күҙалланған.