14.05.2013 Өс һөйләм менән

14 – 16 майҙа Өфөлә «Гагарин көндәре» III республика балалар-үҫмерҙәр фестивале үтә. Йола буйынса, унда Рәсәй Космонав­тика федерацияһы делегацияһы ҡатнаша. Ҡунаҡтар Өфө­нөң 3-сө һәм 103-сө гимназияларына, 60-сы лицейына бара, беҙгә тәүгә Мәскәүҙән Еңеү байрағы килтерелә.

17 майҙа БР Хеҙмәт һәм халыҡты социаль яҡлау министрлығы эшһеҙҙәрҙең мәшғүллегенә ярҙам итеү, һөнәри яҡтан белем биреү мәсьәләләренә арналған «ҡыҙыу линия» ойоштора. Белгестәр 14 – 17 сәғәткә тиклем шылтыратыуҙарҙы ҡабул итәсәк. Һорауҙарҙы 8(347)282-46-19, 282-46-40 телефондары буйынса бирергә мөмкин.

Өфө халыҡ-ара аэропортында заманса метеорологик локатор урынлаштырыласаҡ. Ел-дауыл, йәшен булыуын иҫкәртеүсе ҡорамалдың хаҡы − уртаса 100 млн һум. Республикала ошоноң кеүек тағы дүрт прибор ҡуйыласаҡ.

Ауырғазы районында «Ауыр­ғазы – таҙа йылға» экологик акция­һы үтә. Сараның маҡсаты − йылғаның яр буйы зонаһын таҙартып, бәләкәй йылғаларҙы һаҡлауға иғтибарҙы йүнәлтеү. Әле сарала ҡатнашыусылар Солтанморат, Иҫ­ке Әпсәләм, Кешәнле ауылдары буйлап аҡҡан йылғаның яр буйҙарын йыйыштырып, 25 кубометр сүп-сар түккән.

Сибай ҡалаһы прокуратураһы ҡаланың үҙәк дауаханаһы эшмәкәрлегендә тупаҫ етешһеҙлектәр тапҡан. Һаулыҡ һаҡлауҙы модернизациялау программаһына ярашлы, медицина учреждениеһына 100 берәмек медицина ҡорамалы һатып алынған булған. Әммә улар­ҙың барыһы ла тулы ҡеүәтенә файҙаланылмаған, хатта ҡайһы берҙәре бөтөнләй ҙә ҡулланылмаған, ҡумтаһынан да алынмаған.

16 һәм 17 майҙа Яңауыл ҡалаһында Фәтих Ихсанов призына «Моңға бай гармун байрамы − 2013» исемле бәйге үтә. Ике йәш категорияһы буйынса үткәрелгән конкурста 16 йәшкә тиклемге һәм 17 йәштән олораҡ гармунсылар ике көй уйнап ишеттерергә тейеш. Гран-при яулаусыға 30 мең һум аҡса тапшырыласаҡ.

Нефтекама ҡалаһынан полицияның пост хеҙмәтенең өлкән сержанты Ленар Ғәлләмов «За пра­вопорядок» лотереяһында 7 млн һум аҡса отҡан. Беҙҙең республикала был лотереяның беренсе тиражы 80 мең данала һатыл­ған. Отош аҡсаһы түләнә башлаған да инде.

Быйыл тәүге өс айҙа баш ҡалала йәмәғәт транспортын 62,7 мең кеше файҙаланған. 52 млн кеше автобустарҙа йөрөүҙе хуп күргән. Үткән йыл менән сағыштырғанда, күптәрҙең шәхси автомобиль алыуы сәбәпле, пассажирҙар һаны 10,8 процентҡа кәмегән.

Башҡортостандың ҡала-район­дарында йәшерен казиноларҙы асыҡлау буйынса рейдтар үтә. Йыл башынан 8 мең уйын автоматы тартып алынған, 500 законһыҙ клуб эшмәкәрлегенә сик ҡуйылған. 150 осраҡта ҡомарлы уйын бизнесын алып барыусылар суд алдында яуап бирәсәк.

З. ЙӘҺҮҘИНА әҙерләне.