26.03.2013 Бушлай юридик ярҙам күрһәтеләсәк

“Берҙәм Рәсәй” партияһы рәйесе, РФ Хөкүмәте Премьер-министры Дмитрий Мед-ведевтың Өфөләге төбәк ҡабул итеү бүлмәһендә “Берҙәм Рәсәй” сәйәси партияһының төбәк бүлексәһе секретары, БР Дәүләт Йыйылышы – ҡоролтай Рә­йесе Константин Толкачев менән “Рәсәй юристары ассоциацияһы” Бөтә Рәсәй йә­мәғәт ойошмаһының Башҡор­тостан бүлексәһе етәксеһе Азамат Хәсәнов, Башҡор­тостан адвокаттар коллегияһы президиумы рәйесе Булат Йомаҙилов араһында килешеү төҙөлдө.
Был – халыҡ мәнфәғәтендә төҙөлгән мөһим килешеүҙәр­ҙең береһе. Уның төп маҡсаты – граждандарға бушлай юридик консультациялар биреүҙе ойоштороу. Төрлө ғаризалар яҙғанда, ялыуҙар менән, йә судҡа мөрәжәғәт иткәндә килеп тыуған мәсьәләләрҙе хәл итеү өсөн килешеү бик файҙалы буласаҡ. План буйынса, граждандарҙы бушлай ҡабул итеүсе юристар даими рәүештә республиканың башҡа район-ҡалаларында ла эшләйәсәк. Әлеге ваҡытта юристарға кәңәш һорап килеүселәр араһында торлаҡ-коммуналь хужалыҡ проблемаларын күтәреүселәр бик күп. Башҡа мәсьәләләр ҙә бар һәм уларҙы юристар ярҙамы менән генә хәл итергә мөмкин.
Шулай уҡ был килешеү ярҙамында ауыр хәлгә ҡалған граждандарға сифатлы ярҙам күрһәтеп буласаҡ, һәр хәлдә, бындай килешеүҙәр социаль базаны киңәйтә.
Килешеү төҙөлгәндән һуң “Берҙәм Рәсәй” сәйәси партияһының төбәк бүлексәһе секретары, БР Дәүләт Йыйылышы – ҡоролтай Рәйесе Константин Толкачев граждандар менән осрашты һәм уларҙың һорауҙарына яуап бирҙе. Республика парламенты спикерына бик күп кеше мөрәжәғәт итте.
Осрашыуҙа күренеүенсә, граждандарҙы яңы микрорайондарҙы газификациялау, электрификациялау кеүек мәсьәләләр борсой. Шулай уҡ шәхси йорттар төҙөлгән микрорайондарҙа юлдар насар булыуға ла зарланыусылар бихисап. Әлбиттә, коммуникациялар бер райондың көсө менән генә атҡарып сығырлыҡ эш түгел, шуға ла килеп тыуған мәсьәләне хәл итеү өсөн Башҡортостан Респуб­ли­каһының Финанс министрлығына хат менән мөрәжәғәт итергә ҡарар ителде.