09.10.2010 «БЫЛ КӨН БАРЫБЫҘ ӨСӨН ДӘ ҠӘҘЕРЛЕ»
Луиза ДӘҮЛӘТШИНА, Баймаҡ районының үҙәкләштерелгән китапханалар селтәре директоры:
– Республика көнө, асылда, Башҡортостан халҡының иң ҙур байрамы, тигән ҡараштамын. Һуңғы йылдарҙағы яҡшы үҙгәрештәр хаҡында әйтмәксемен. Китапханасы булараҡ, ваҡытлы матбуғатта, башҡорт нәшриәтендә булған үҙгәрештәрҙе билдәләмәү мөмкин түгел. Һуңғы йылдарҙа Башҡортостан «Китап» нәшриәте барыбыҙҙы ла яңынан-яңы китаптар менән шатландыра. Дини тәрбиә, әхлаҡ, арҙаҡлы шәхестәребеҙ – быларҙың барыһы ла нәшриәтебеҙ тарафынан иғтибарһыҙ ҡалдырылмай. Шулай уҡ гәзит-журналдарыбыҙ ҙа уҡымлы материалдар менән тулы – «Башҡортостан ҡыҙы», «Шоңҡар», «Ағиҙел» журналдары, «Йәшлек», «Киске Өфө» гәзиттәрен күҙ уңында тотам.
Шулай уҡ Шәжәрә байрамдары, йәштәр өсөн мәҙәни сараларҙың даими уҙғарылыуы яҡшы. Әлбиттә, эсте бошорғос күренештәр ҙә күп был тормошта. Әммә иң әһәмиәтле байрамыбыҙ – Республика көнөнә барыбер яҡшы кәйеф-өмөт менән бағам һәм башҡаларға ла шуны теләйем. Байрам менән!
Әмир СӘЙҒӘФӘРОВ, Баймаҡ районының һәм ҡалаһының почетлы гражданы:
– Башҡорттоң бөтә тарихы быуаттар буйы үҙаллылығын, динен, мәҙәниәтен – үҙенең булмышын яҡлау, һаҡлап алып ҡалыу өсөн көрәш менән һуғарылған. Батырша яуы, Алдар Иҫәкәев ваҡытындағы ихтилалдар, унан ҡала Октябрь революцияһынан һуңғы Бөрйән-Түңгәүер ихтилалы – быларҙың барыһы ла тап беҙҙең Бөрйән ырыуы башҡорттарына, Баймаҡ ерлегенә бәйле ирек өсөн көрәш тарихы биттәре. Тотош Башҡортостанды алһаң, һанап сығыуы оҙаҡ булыр.
Бынан егерме йыл элек, үҙаллылыҡты яҡлап митингыла ҡатнашырға тип йөҙ кешене йыйып, Өфөгә юлландыҡ. Барһаҡ, берәүҙән дә фарман көтөп ятмаған баймаҡтар – йәмғеһе алты йөҙҙән ашыу йәш-елкенсәк, ҡарт-ҡоро митингыла үҙаллылыҡ талап итеүселәрҙең алғы сафында тора ине. Шуға ла Республика көнө беҙҙең өсөн әһәмиәтен юғалтмай, киреһенсә ҡәҙерлерәк, ғәзизерәк булып ҡала бирә.
И. ҡАНСУРИН
яҙып алды.
Оҡшаш яңылыҡтар
