03.04.2012 Гүзәл заттар партияға берләшә

Рәсәйҙә ҡатын-ҡыҙҙар партияһы барлыҡҡа килде. Уның ойоштороу йыйылышы Мәскәүҙә Рәсәй ҡатын-ҡыҙҙары конференцияһы сигендә үтте.
Конференцияла республика исеменән Башҡортостан ҡатын-ҡыҙҙар союзы рәйесе Рәшиҙә Солтанова ҡатнашты. Уның билдәләүенсә, ҡатын-ҡыҙҙарҙың сәйәси партияһын булдырыу хаҡында ҡарар ҡабул итеү партияларҙы теркәү тураһындағы ҡануниәтте ябайлаштырыуға бәйле. Әйткәндәй, бындай партия 1990 йылдарҙа булған.
− Конференция барышында башҡа төбәктәрҙән хеҙмәттәштәрем менән аралашып, уларҙа РФ Дәүләт Думаһы депутаттарын һайлау алдынан үткәрелгән праймеризда күп ҡатындарҙың уңышлы ҡатнашҡаны тураһында белдем, − тип һөйләй Рәшиҙә Солтанова. − Әммә улар депутатлыҡҡа үтмәгән. Башҡортостандан Дәүләт Дума­һына һайланған депутаттар араһында өс ҡатын булыуы тураһында һөйләгәс, конференцияла ҡатнашыусылар ныҡ аптыраны. Күп төбәктәр­ҙә бер ҡатын да парламентҡа һайланмаған. ҡатын-ҡыҙҙар партияһы беҙҙең хоҡуҡтар­ҙы яҡлай аласаҡ һәм бындай ғәҙел­һеҙлеккә юл ҡуймаясаҡ, тип ышанам.
Яңы партияның уставы һәм программаһы ҡабул ителәсәк, Башҡортостанда ла уның бүлексәһе булдырыласаҡ. Партияның төбәк бүлексәһе структураһы тураһында ҡарар Өфөлә тиҙҙән уҙғарыласаҡ йыйылышта ҡабул ителә.