11.06.2019 Лайыҡлылар билдәләнде һәм бүләкләнде!

Булат Солтангәрәев исемендәге республика уҡыусылар конкурсының быйылғы ярышы тамамланды.

21 май иртәһе редакциябыҙҙа ҡыҙыу башланды. Ни булды, тиерһегеҙ: уҡыусыларҙың ижади бәйгеһенә йомғаҡ яһаныҡ. Башҡорт әҙәбиәте белгесе, яҙыусы, филология фәндәре докторы, профессор Тимерғәле Килмөхәмәтов рәйеслегендәге баһалама комиссияһы гәзиттә донъя күргән эштәрҙе ҡараны.

Бәйге 2018 йылдың ок­тябрендә башланды. Һигеҙ ай буйы беҙ «Бәйләнештә» селтәре, электрон почта аша ҡулъяҙ­маларҙы ҡабул иттек, уларҙы гәзит биттәрендә баҫтырҙыҡ, сайтҡа һалдыҡ. Конкурсҡа ебәргән эштәрҙә уҡыусы-студенттар халҡым, телем, ерем тип янып-көйә, тәбиғәтте һаҡлау, киләсәкте күҙал­лау, тарих хаҡында уйлана. Ҡыҙыҡлы, көтөлмәгән идея-фекерҙәр күп осраны. Ебәрелгән ҡулъяҙмалар араһынан 18 мәҡәлә һайлап алынып, гәзит бит­тәрендә, сайтта донъя күрҙе.

Баһалама комиссияһы ташҡа баҫылған эштәрҙе ҡа­раны. Премияларҙы алты кешегә бирергә ҡарар иттек. Бынан тыш, өс уҡыусыға «Йәшлек» гә­зитенең махсус призы тапшырыласаҡ.

Шулай итеп, 2019 йылғы бәйгелә беренсе премияны «Асылыбыҙ – тыуған ерҙә, туған телдә» тигән мәҡәләһе менән Гөлдәриә ҒАЙСИНА яуланы.

Ул – Күгәрсен райо­нының Хоҙайбирҙин ауы­лы ҡыҙы. Күмертау ҡала­һындағы 3-сө башҡорт республика гимназия-интернатында 11-се класта уҡый, «Рухи мираҫ» йәш журналистар түңәрәге ағзаһы. Автор үҙ эшендә тыуған ил, ауыл яҙмышы тура­һында уйлана, тел мәсьәләләрен күтәрә. Баһалама комиссияһы ағзалары Гөлдәриәнең эшен юғары баһалап, уға беренсе премияны бирергә хәл итте.

Икенсе премия ике кешегә бирелде. Улар – Өфө ҡалаһындағы 48-се башҡорт гим­назияһының 8 Б класы уҡыусыһы Искәндәр ШӘМҒОЛОВ менән Мәләүез районы Үрге Юлдаш ауылындағы Советтар Союзы Геройы З. Үтәғолов исемендәге мәктәптең 9-сы класс уҡыусыһы Нәфис ИШҺАРИН.

Өсөнсө премия өс кешегә тап­шыры­ласаҡ. Уға Асҡын районы Ҡыйғаҙы урта мәктәбенең 11-се класс уҡыусыһы Хәлимә ДӘҮ­ЛӘТГӘРӘЕВА, Әбйәлил районы Амангилде урта мәк­тә­бенең 11-се класс уҡыусыһы Әлиә ӨМӨТ­ҠУЖИНА, Баймаҡ районы Билал мәктәбенең 11-се класс уҡыусыһы Гөлфирә НАРЫНБАЕВА лайыҡ булды.

«Йәшлек» гәзитенән махсус бүләктәр түбән­дәгеләргә бирелде:
– Баймаҡ районы Сәйғәфәр мәктәбенең 11-се класс уҡыусыһы Таңсулпан РАЙМАНОВА;
– Рәми Ғарипов исемендәге 1-ce башҡорт республика гимназия-интер­натының 11-се класс уҡыусыһы Разия ҒИБӘҘӘТОВА;
– Күмертау ҡала­һының Республика политехник лицей-интернаты 11-се класс уҡыусыһы Диана СОЛТАНГӘРӘЕВА.

Эштәре гәзиттә баҫылып та, урын алмағандар ҡай­ғырмаһын. Улар «Халҡым киләсәге» номинацияһында билдәләнде:
– Азалия Камалова (Баймаҡ ра­йонының Өмөтбай мәктәбе, 8-се класс);
– Вилиә Кинйә­баева (Баймаҡ, Урал аръяғы агросәнәғәт колледжы, беренсе курс студенты);
– Наҙгөл КҮСӘР­БАЕВА (Баймаҡ лицей-интернаты, 10 А класы);
– Линиза ШӘЙХИТДИНОВА (Учалы районының Ураҙ лицейы, 8-се класс);
– Индира ӘҘЕҺӘМОВА (Баймаҡ районының Сәйғәфәр мәктәбе, 11-се класс);
– Ғәзинур ИҪӘНАМАНОВ (Салауат мәғариф һәм һөнәри технологиялар колледжы, 2-се курс студенты);
– Юлиә БОҪҠОНОВА (Йылайыр районының Матрай мəктəбе, 10-сы класс)
– Гөлшат НУРЛЫЕВА (Асҡын районы Ҡыйғаҙы мәктәбе, 10-сы класс);
– Мәүлиҙә МӘҒӘФҮРОВА (Әбйәлил районының Буранғол мәктәбе, 11-се класс).

Еңеүселәргә ошо адрес буйынса редакцияға: Өфө ҡалаһы, Октябрҙең 50 йыллығы урамы, 13, 814-се кабинет, иртәнге сәғәт 9-ҙан киске 6-ға тиклем килеп, бүләктәрен һәм Шөһрәт­намәләрен алырға ҡала. Рәхим итегеҙ!
1, 2, 3 премия алыусыларҙы «Йәшлек» гәзите журналистары «Һуңғы ҡыңғырау» көнөндә үҙҙәре барып ҡотланы.