20.12.2011 Уҡыу алдынғылары – Президент янында
Башҡортостан Президенты Рөстәм Хәмитов шәмбелә «Президент көндәлеге» конкурсында еңеүсе уҡыусылар менән осрашты. Осрашыуға төрлө ҡала һәм райондарҙан уҡыу йылы башынан алып иң күп «бишле» билдәһе алыусы 30 уҡыусы килде.
Президент һәр уҡыусының көндәлегендә иҫтәлекле яҙма ҡалдырҙы һәм уларҙың һорауҙарына яуап бирҙе. Өфө ҡалаһының 136-сы мәктәбенән 3-сө синыф уҡыусыһы республика етәксеһенән, нисек итеп Президент шыршыһына саҡырыу ҡағыҙы алырға мөмкин, тип ҡыҙыҡһынды. Рөстәм Зәки улы уның һорауына яуап итеп, осрашыуҙа ҡатнашыусыларҙың барыһын да 21 декабрҙә Нефтселәр мәҙәниәт һарайында үтәсәк республиканың төп шыршы байрамына саҡырҙы. «Һеҙҙең көндәлектәге минең ҡултамғам Президент шыршыһына саҡырыу ҡағыҙы булыр», – тине ул.
Әйткәндәй, «Президент көндәлеге» конкурсы «Комсомольская правда» нәшриәт йорто менән берлектә ойошторолдо.