05.02.2019 «Битлек, мин һине таныным!»
2018 йылдың аҙағында “Йәшлек” гәзите интернет ҡулланыусылар өсөн конкурс иғлан иткәйне. Бала саҡта Яңы йыл кисәһенә кейенәсәгең тураһында хыялланаһың. Кем булып ҡына кейенмәнек беҙ – Айыу, Бүре, Ҡуян, Ҡар бөртөгө, Буратино, Украин ҡыҙы һ.б. Фантазияға бай бәләкәстәр маскарадҡа бөгөн әллә ниндәй костюмдар һорайҙыр әле! Магазин кәштәләрендә әҙерҙәре лә тулып ята, әлбиттә. Ҡай саҡта шыршы тирәләй бер төрлө унышар эт, бесәй, төлкө һәм башҡалар йыйылып китә торған. Синтетик тауарҙан тән тын алғыһыҙ итеп тегелгән әҙер костюмдарҙа балалар шыршы байрамынан һуң хәлһеҙләнеп, кәйефһеҙләнеп ҡайта. Ә бына ҡул йылыһын, күҙ нурын һалып үҙең теккән костюмға бер ни ҙә етмәй, эйеме? «Яңы йыл ҡунағы» тип аталған бәйгелә ҡул эше булған костюмдар ғына ҡатнаша алды.
Ата-әсәләр, балаларын иртәлектәргә, маскарад балына әҙерләгәндә, уларҙы фотоға төшөрөп беҙҙең “Бәйләнештә” сайтындағы төркөмгә ебәрҙе. Иң матур костюмдар һеҙгә лә ҡыҙыҡ булыр, тибеҙ.
Башҡорт егете булдым,
Һеңлемә батыр ағай,
Бер аҙ аптырашта ҡалды
Себерҙән ҡайтҡас атай! – тип яҙа Дыуан районының Мәсәғүт ауылынан Ильяс Яҡупов. Әсәһе теккән милли кейемгә ҡыуанған бәләкәс Ҡыш бабайға әҙерләгән шиғырын да һалып ебәргән.
Ишембай ҡалаһынан 6 йәшлек игеҙәктәр Дилара һәм Динара Ғүмәроваларҙың ҡулынан килмәгән эш юҡ. Йыр-моңға маһир ҡыҙҙар ата-әсәһенең терәге булып буй еткерә. “Тыуған көнөнә теген машинаһын һатып алғас, апайым игеҙәктәренә күлдәктәрҙе үҙе тегә башланы, – тип яҙа Розалия Бағышаева. – Балалар баҡсаһындағы Яңы йылда сығыш яһау өсөн ҡыҙҙарына көнсығыш костюмдарын күңел йылыһын һалып текте. Апайымдың ҡул оҫталығы һәр саҡ һөйөнөстәр генә килтерә!”
Салауат районының Малаяҙ ауылы ҡыҙы Алина Шәйәхмәтова һәм Баймаҡ ҡалаһынан Шәүрә Әминева Ҡыш бабайға ҡунаҡҡа Ҡарһылыу һәм Буранбикә булып йыйынған икән. Ҡайһы бер балалар баҡсаларының бәләкәй төркөмдәрендә, сценарийға һылтанып, балаларға бер иш костюмдарҙа килергә ҡушалар. Бына Инсан Йәһүҙин да, Санта Клаус кейеменә “заказ” биргәстәре, әсәһенән Яңы йыл хужаһының кейемен бына тигән итеп тектергән. Ә заманса әкиәт геройҙарының ниндәйе генә юҡ – Бэтмен, Леди Баг, Смешарик, Мөгөҙлө пони, Зорро һәм башҡалар.
– Исмәғил улым өсөн уҙған йыл бик һөҙөмтәле булды. Төрлө шахмат турнирҙарында ҡатнашып, еңеп сыҡты, ни бары 9 йәш булыуына ҡарамаҫтан, өсөнсө разрядҡа эйә булды, – тип яҙа Хәйбулла районының Аҡъяр ауылында йәшәүсе Ғәлиевтар ғаиләһе. Малайға ошо еңеүҙәре хөрмәтенә Шахмат короле кейемен теккәндәр. Афарин, Исмәғил! Һәр саҡ ата-әсәйеңде уңыштарың, тәртибең менән ҡыуандырып тор!
Шулай итеп, маскарад костюмдары парадын башлайбыҙ. Матур һәм зауыҡлы милли орнаменттар һалынған костюмға өҫтөнлөк бирҙек – гран-при Сибай ҡалаһынан Алһыу Ғәбитоваға (Ҡурай костюмы) тапшырыла!
Беренсе урынға лайыҡ булыусылар – Клоун (Данил Һөйөндөков, Сибай ҡалаһы), Төлкөбикә (Айһылыу Арыҫланғужина, Бөрйән районының Иҫке Мөсәт ауылы), Смешариктар (Гүзәлиә, Ғәлиә һәм Камила Садиҡовалар, Баймаҡ районының Өмөтбай ауылы), Ҡуянҡай (Сафия Исхаҡова, Өфө ҡалаһы) һәм Шахмат короле (Исмәғил Ғәлиев).
Сағыу һәм оҫта тегелгән костюмдар араһынан түбәндәгеләр икенсе урынға лайыҡ булды: Гусар (Вилдан Хәмитов, Сибай ҡалаһы), Бал ҡорто (Рәлиә Арыҫланғужина, Бөрйән районының Иҫке Мөсәт ауылы), Ҡыҙыл Башлыҡ (Сөмбөл Һибәтова, Әбйәлил районының Яңауыл ауылы), Сусҡа (Руслан Аҡҡужин, Йылайыр районының Йомағужа ауылы), Көнсығыш ҡыҙҙары (Дилара һәм Динара Ғүмәровалар), Мөгөҙлө пони (Рената Халиҡова, Сибай ҡалаһы).
Әбйәлил районының Рысҡужа ауылынан ағайлы-һеңлеле Ислам менән Сулпан Яҡуповтар Бэтмен һәм Леди Баг, Әзизә Даушева Ҡуян костюмдары менән өсөнсө урынды яуланы. Шулай уҡ өсөнсө баҫҡыста – Йондоҙ һанаусы ҡыҙ Регина Зәбитова (Сибай ҡалаһы), Панда (Сыңғыҙ Билалов, Бөрйән районының Килдеғол ауылы), Сусҡа костюмындағы апайлы-ҡустылы Айгизә һәм Динислам Латиповтар, Йондоҙ һанаусы малай Илгиз Теләүсин (Бөрйән районының Байназар ауылы) һәм Илйәнә Дәүләтова (Сибай ҡалаһы). Конкурстың еңеүселәре һәм ҡатнашыусылары маҡтау һәм дәртләндереү ҡағыҙҙары менән бүләкләнә. Юл төшкәндә, беҙҙең редакцияға һуғылып үтеүегеҙҙе һорайбыҙ.
Сираттағы балалар бәйгеһе геүләп үтеп тә китте. Бәләкәстәрҙең күңелен күреүсе оҫта ҡуллы әсәй-инәйҙәребеҙгә ҙур рәхмәт. Тормош йәме – ул-ҡыҙҙарыбыҙ зиһенле, сәләмәт, тырыш, тәртипле булып үҫһен!