29.01.2019 Өфөлә «Баш ҡаланың йыл уҡытыусыһы – 2019» конкурсының абсолют еңеүсеһе билдәле булды

Өфөлә, Рус дәүләт академия драма театрында, XХII «Баш ҡаланың йыл уҡытыусыһы – 2019» ҡала конкурсын һәм XV «Баш ҡаланың башҡорт теле һәм әҙәбиәте йыл уҡытыусыһы – 2019» ҡала конкурсын ябыу тантанаһы уҙҙы. Бөтә конкурс һынауҙары йомғаҡтары буйынса лауреаттар һәм еңеүселәр билдәләнде.

«Баш ҡаланың йыл уҡытыусыһы – 2019» конкурсының абсолют еңеүсеһе – 47-се гимназияның иҡтисад уҡытыусыһы Ирина Хисмәтуллина.

Иң яҡшы башҡорт теле һәм әҙәбиәте уҡытыусыһы исемен 7-се мәктәптән Гөлшат Ғәбитова алды. 65-се татар гимназияһынан Гүзәл Заһитова иң яҡшы татар теле һәм әҙәбиәте уҡытыусыһы тип танылды. Иң яҡшы рус теле һәм әҙәбиәте уҡытыусыһы – 6-сы лицейҙан Айгөл Хөсәйенова.

«Педагогик дебют» номинацияһында – 160-сы лицейҙың һынлы сәнғәт уҡытыусыһы Ангелина Тимирова, ә «Педагогик өмөт» номинацияһында (башҡорт теле һәм әҙәбиәте уҡытыусылары араһында) 103-сө мәктәптән Зөлфиә Иҫәнбаева еңеү яуланы.

Бәйгелә бөтәһе 17 фән буйынса 66 уҡытыусы ҡатнашты. Улар араһында — 27 йәш уҡытыусы. Дүртенсе йыл рәттән йәш уҡытыусыларға ярҙам итеү маҡсатында «Баш ҡаланың йыл уҡытыусыһы» конкурсында ҡатнашыусыларға — «Педагогик дебют», «Баш ҡаланың башҡорт теле һәм әҙәбиәте йыл уҡытыусыһы» конкурсанттары өсөн «Педагогик өмөт» номинациялары булдырылды.

22 йыл дауамында «Башҡортостандың баш ҡалаһының йыл уҡытыусыһы» ҡала конкурсында 2,5 меңдән ашыу кеше ҡатнашты, 600-ҙән күберәк уҡытыусы лауреат исемен алды. Өфө уҡытыусылары 19 тапҡыр «Йыл уҡытыусыһы» республика конкурсы еңеүселәре булды.

Шулай уҡ Рәсәйҙең халыҡ мәғарифы һәм фән хеҙмәткәрҙәре профсоюзының Башҡортостан комитеты наградалары тапшырылды. «Башҡортостандың баш ҡалаһының башҡорт теле һәм әҙәбиәте йыл уҡытыусыһы» конкурсында ҡатнашыусылар Бөтә донъя башҡорттары ҡоролтайынан махсус бүләктәр алды.