05.07.2013 Ниндәй университетты һайланың, дуҫ?

Билдәле булыуынса, беҙҙең республиканың сығарылыш уҡыусылары илдең төрлө төбәктәрендәге юғары уҡыу йорттарына уҡырға бик әүҙем инә. Быға Башҡортостандың студенттар һәм аспиранттар ассоциацияһы ҙур өлөш индерә. 1 июлдән Өфөлә профориентация буйынса осрашыу­ҙар башланды. Ассоциация вәкилдәре йыл дауамында сығарылыш уҡыусылары һәм алдынғы вуздар­ҙың хакимиәттәре менән һөйләшеүҙәр алып барғайны. Шуның һөҙөмтәһе − бик күп уҡыу йорттары менән хеҙмәттәшлек тураһында килешеүҙәр төҙөлгән.

Башҡортостандың студенттар һәм аспиранттар ассоциацияһы ошондай форматта йыл дауамында эшләй. Уларҙың ярҙамы менән республикабыҙҙың меңдән ашыу егете һәм ҡыҙы илдең иң алдынғы уҡыу йорттарына уҡырға ингән. Әгәр Мәскәү, Санкт-Петербург кеүек ҡалалар­ҙағы иң шәп университеттарҙа уҡығығыҙ килһә, http://башстудент.рф/ сайтына инеп, мөмкинлектәр менән танышырға була. Шунда уҡ анкета тултырыу ҙа талап ителә.
Быйыл республика мәктәптәрен уңышлы тамамлаусылар бик күп булды, уҡыусыларҙың барыһына ла теләктәренең бойомға ашыуын теләйбеҙ, белемегеҙ төп көсөгөҙ булһын. Уҡыусыларҙы оло тормош­ҡа аяҡ баҫтырған, белем биргән уҡытыусыларына егет һәм ҡыҙҙар үҙҙәре лә, уларҙың ата-әсәләре лә рәхмәтле. Ошондай бер рәхмәт кәлимәһен “Йәш­лек” битендә лә баҫырға булдыҡ. Уны гимназияның барлыҡ ата-әсәләре исеменән Күгәрсен районының Һапаш ауылынан Рәүзилә МӨХӘМӘТШИНА яҙған.