27.04.2012 Белем һатыламы?

Уҡыу энә ме­нән ҡойо ҡа­ҙыу­ға бә­рәбәр, тип юҡҡа әйтмәйҙәр. Имти­хан-зачет, контроль эштәр студенттарҙың күбеһенең елегенә үтеп инә. Шулай ҙа улар араһында анһат юл менән һөнәр эйәһе булыр­ға теләүселәр ҙә осрап ҡуя. Һорау булһа, тауары табыла. был – баҙар ҡануны.
Ошо көндәрҙә Башҡор­тостан буйынса Эске эштәр министрлығының иҡтисади енәйәттәргә ҡаршы көрәш идаралығы хеҙмәткәрҙәре ялған диплом етештереү «цехы»ның эшмәкәрлегенә сик ҡуйған. 240 мең һумға дүрт диплом һатҡан мәлдә өс кеше ҡулға алынған.
Улар клиенттарын, документ уҡыу йортоноң реестрына индерелгән, тип ышандырған. Ысынбарлыҡта оятһыҙ әҙәмдәр бер ҡатлы халыҡты төп башына ултыртҡан − был ҡағыҙҙарҙың бер ниндәй ҙә юридик көсө булмаған.
39 йәшлек ҡатын интернет аша клиенттар эҙләү менән мәшғүл булһа, 50 йәшлек ир уҡыу йорттарының мисәттәрен эшләгән, ялған документтар әҙерләгән. Ә 47 йәшлек ҡатын аралашсы ролен үтәгән. Бер диплом яҡынса 70 мең һумға һатылған.
Полиция мисәт, махсус бланкыларҙы тартып алған. Хәҙер клиенттар базаһы буйынса быға тиклем диплом һатып алған клиенттар асыҡлана. Ә мутлыҡ ҡылыусыларға ҡарата енәйәт эше ҡуҙғатыу мәсьәләһе ҡарала.
Г. ЯХИНА.